Որ ապրանքներն են թանկացել, որոնք էժանացել Հայաստանում 2025-ին

2025-ի հունվար-օգոստոսին Հայաստանում սպառողական գների ինդեքսն աճել է 3․2%-ով

Վիճակագրական կոմիտեի տվյալներով՝ 2025թ․ հունվար-օգոստոսին Հայաստանում սպառողական գների ինդեքսը 2024թ․ նույն ժամանակահատվածի համեմատ աճել է 3․2 տոկոսով։ 2024թ․ դեկտեմբերի համեմատ արձանագրվել է 0․8 տոկոսի աճ։

Սննդամթերքի և ոչ ալկոհոլային խմիչքների գները բարձրացել են 5․1 տոկոսով։ Ալկոհոլային խմիչքների և ծխախոտի գներն աճել են 5․5 տոկոսով։

Հագուստի և կոշիկի գները նվազել են 2 տոկոսով։

Բնակարանային ծառայությունների, ջրի, գազի և էլեկտրաէներգիայի գները բարձրացել են 0․8 տոկոսով։

Տնային տեխնիկայի և սպասարկման գներն անկում են գրանցել՝ 0․6 տոկոս։

Առողջապահական ծառայությունների գներն աճել են 3․5 տոկոսով, իսկ տրանսպորտինը՝ 4․6 տոկոսով։

Կապի ծառայությունների սակագները նվազել են 0․1 տոկոսով։

Հանգստի և մշակույթի գներն աճել են 1․2 տոկոսով, կրթության ոլորտինը՝ 7․8 տոկոսով։

Ռեստորանների և հյուրանոցների գներն աճել են 1․8 տոկոսով, իսկ տարբեր ապրանքների ու ծառայությունների գները նվազել են 0․4 տոկոսով։

2025թ․ օգոստոսին 2024թ․ օգոստոսի համեմատ սննդամթերքի և ոչ ալկոհոլային խմիչքների գները բարձրացել են 4․9 տոկոսով։ Միևնույն ժամանակ հուլիսի համեմատ ընդհանուր մակարդակը մնացել է անփոփոխ։ Մայրաքաղաքում արձանագրվել է 0․1 տոկոսի անկում։

Սննդամթերքի որոշ ապրանքների գների փոփոխությունները եղել են հետևյալը․ բրինձ՝ +0․7%, հաճարիկ՝ +1․5%, լոբի՝ +2․1%, հաց՝ +5․1%, ոլոռ՝ +7․8%։ Խոզի միսը թանկացել է 10․3 տոկոսով, կարագը՝ 12․8 տոկոսով, արևածաղկի յուղը՝ 16․8 տոկոսով, սուրճը՝ 13․5 տոկոսով, կակաոն՝ 22․5 տոկոսով։ Ձվի գինը նվազել է 5․8 տոկոսով, հնդկացորենինը՝ 2․7 տոկոսով։ Միաժամանակ, մրգերի գներն աճել են 11․6 տոկոսով։

Ոչ պարենային ապրանքների գներն աճել են 1․1 տոկոսով։ Մայրաքաղաքում օգոստոսին հուլիսի համեմատ արձանագրվել է 0․6 տոկոսի աճ։ Բենզինի գներն տարեկան կտրվածքով նվազել են 2․9 տոկոսով, դիզելինը՝ 2․4 տոկոսով։ Հեղուկ գազի գները տարեկան կտրվածքով նվազել են 14․1 տոկոսով։

Ծառայությունների սակագները 2025թ․ օգոստոսին նախորդ տարվա նույն ամսվա համեմատ աճել են 3․2 տոկոսով, իսկ հուլիսի համեմատ՝ 0․3 տոկոսով։

Արտարժույթի շուկայում օգոստոսին արձանագրվել է սպառողական գների 0․2 տոկոսի աճ և ԱՄՆ դոլարի նկատմամբ դրամի փոխարժեքի 0․2 տոկոսի նվազում։ Դրամի միջին փոխարժեքը կազմել է 383․2 դրամ՝ 1․3 տոկոսով ցածր, քան նախորդ տարվա օգոստոսին։