Պատրաստ ենք Հայաստանին առաջարկել մոդուլային ռեակտորներից մինչև խոշոր կայանի կառուցում. Զախարովա

Զախարովան արձագանքում է արևմտյան երկրների կողմից ռուս-հայկական համագործակցության դեմ հնչող պնդումներին։

Ռուսաստանը պատրաստ է Հայաստանին առաջարկել ատոմային էներգետիկայի զարգացման տարբեր տարբերակներ՝ փոքր մոդուլային ռեակտորներից մինչև նոր խոշոր կայանի կառուցում, որը հիմնված է ապացուցված և հուսալի տեխնոլոգիաների վրա. հայտարարել է ՌԴ ԱԳՆ ներկայացուցիչ Մարիա Զախարովան։ 

«Մենք տեսնում ենք հայկական կողմի շահագրգռվածությունը՝ շարունակել համագործակցությունը խաղաղ ատոմի ոլորտում։ Կես դար՝ Մեծամորի ատոմակայանի հիմնարկեքից ի վեր, մեր մասնագետները աջակցում են փորձի սերտ փոխանակմանը»,- ընդգծել է Զախարովան։ 

Նրա խոսքով, ներկայումս «Ռոսատոմը» հայերի հետ աշխատանքներ է տանում գործող կայանի շահագործումը մինչև 2036թ. երկարաձգելու ուղղությամբ, ինչպես նաև քննարկում է նոր էներգաբլոկների կառուցման հեռանկարները. «Ռուսական կողմը հասկանում է, որ Հայաստանն այդ հարցին հիմնավոր է մոտենում՝ գնահատելով բոլոր հնարավոր տարբերակները։ «Ռոսատոմի» ղեկավարությունը կանոնավոր կապ է պահպանում երկրի կառավարության հետ»։ 

Զախարովան նաև նշել է, որ Ռուսաստանն արձանագրում է արևմտյան երկրների «չարակամների» փորձերը՝ վարկաբեկելու ռուս-հայկական համագործակցությունը ատոմային ոլորտում: Մասնավորապես, զլմ-ներում կեղծ պնդումներ են տարածվում ատոմակայանի մոտալուտ խափանման կամ լուրջ սպառնալիքի մասին, որն իբր այն ներկայացնում է տարածաշրջանի համար։