Netflix-ը հայտարարել էր Warner Bros-ի կինոստուդիան և հոսքային ծառայությունները 72 միլիարդ դոլարով ձեռք բերելու մասին։

Երկուշաբթի օրը Paramount Global-ի և Skydance Media-ի միացված կոնսորցիումը  Warner Bros Discovery (WBD) ընկերությունը ձեռք բերելու նոր առաջարկ է ներկայացրել։ Նրանք պատրաստ են WBD-ն ձեռք բերել 108,4 միլիարդ դոլարով։ Առաջարկը նախատեսում է 30 դոլար մեկ սովորական բաժնետոմսի դիմաց և ներառում է Warner Bros Discovery-ի բոլոր ակտիվները, այդ թվում՝ CNN-ը, HBO-ն և մյուս կաբելային ալիքները։

Paramount-ի հայտարարությունում ընդգծվում է, որ իրենց առաջարկը «շատ ավելի շահավետ այլընտրանք է» Netflix-ի հետ ավելի վաղ հայտարարված գործարքի համեմատ, քանի որ այն ապահովում է զգալիորեն բարձր գին բաժնետերերի համար և մեծացնում է կարգավորիչ մարմինների կողմից հաստատում ստանալու հավանականությունը։

ԱՄՆ Արժեթղթերի և բորսաների հանձնաժողովին (SEC) ներկայացված փաստաթղթերում նշվում է, որ գործարքի ֆինանսավորմանը մասնակցողներից մեկը նաև ԱՄՆ նախագահ Դոնալդ Թրամփի փեսան՝ Ջարեդ Քուշներն է։

Հիշեցնենք, որ նախորդ շաբաթ Netflix-ը հայտարարել էր Warner Bros-ի կինոստուդիան և հոսքային ծառայությունները 72 միլիարդ դոլարով ձեռք բերելու մասին։ Ակնկալվում էր, որ այդ համաձայնությունը կավարտվի 2026 թվականի երրորդ եռամսյակում՝ WBD Discovery Global ստորաբաժանումը առանձին հանրային ընկերություն դարձնելուց հետո։

Նախագահ Դոնալդ Թրամփը մեկնաբանել էր Netflix-ի առաջարկը՝ ասելով, որ այն «կարող է խնդիրներ ունենալ» կարգավորիչների հետ՝ շուկայում հնարավոր գերիշխանության վտանգի պատճառով։

Երկուշաբթի CNBC-ին տված հարցազրույցում Paramount-ի սեփականատեր Դևիդ Էլիսոնը ներկայացրել է իրենց առաջարկի առավելությունները մեդիաարդյունաբերության համար՝ շեշտելով, որ Warner Bros Discovery-ի վաճառքը Netflix-ին կարող է չափազանց մեծ ազդեցություն անցնել մեկ ընկերության ձեռքում։