Պատերազմի կողքին՝ գործարքներ․ ինչի շուրջ են իրականում բանակցում Վաշինգտոնն ու Մոսկվան

Խոշոր ֆինանսական խոստումները վաղուց են Վլադիմիր Պուտինի քաղաքական գործիքակազմի մաս կազմում։

Վերջին մեկ տարում Ուկրաինայի պատերազմի ավարտի շուրջ ընթանում են երկու զուգահեռ բանակցություններ։ Մի կողմից՝ ԱՄՆ-ի գլխավորած քաղաքական քննարկումներ Ռուսաստանի հետ, որոնք շարունակում են փակուղում մնալ տարածքների և անվտանգության երաշխիքների հարցում։ Մյուս կողմից՝ ավելի լուռ, բայց ոչ պակաս կարևոր բանակցություններ՝ բիզնեսի շուրջ։

Ուկրաինայի նախագահ Վոլոդիմիր Զելենսկին, հղում անելով հետախուզական տվյալներին, պնդում է, որ Մոսկվան Վաշինգտոնին առաջարկել է մինչև 12 տրիլիոն դոլարի գործարքներ՝ պատժամիջոցների մեղմացման դիմաց։ Եվրոպայում մտահոգված են, որ ԱՄՆ նախագահ Դոնալդ Թրամփ-ը կարող է մինչև հունիս Ուկրաինային պարտադրել ծանր զիջումներ՝ խաղաղության իր վերջնաժամկետը պահելու և ռուսական «ոսկուն» հասնելու համար։

Խոշոր ֆինանսական խոստումները վաղուց են Վլադիմիր Պուտինի քաղաքական գործիքակազմի մաս կազմում։ Ըստ The Economist-ի, դեռևս անցած ամռանը պատրաստվել էր հատուկ փաստաթուղթ՝ ինչպես «մեծ գործարքը» ներկայացնել Թրամփին։ Այդ ժամանակից ի վեր ռուսական պետական հիմնադրամի ղեկավարը բազմիցս հանդիպել է Թրամփի հատուկ բանագնացին, իսկ նախագահի ընտանիքին մոտ կանգնած անձինք քննարկել են ռուսական էներգետիկ ակտիվներում ներդրումների հարցեր։

Սեղանին են եղել Արկտիկայի նավթագազային նախագծեր, հազվագյուտ մետաղների հանքեր, միջուկային տվյալների կենտրոն և նույնիսկ Բերինգի նեղուցի տակ թունել։ Ռուսաստան-ԱՄՆ այս մերձեցումը երկուստեք շահավետ է թվում․ Մոսկվային ճնշում են ցածր նավթի գներն ու պատժամիջոցները, իսկ Վաշինգտոնը արդյունքների կարիք ունի՝ առաջիկա միջանկյալ ընտրություններից առաջ։