ԱՄՆ-ի և Չինաստանի միջև TikTok-ի վերաբերյալ պայմանավորվածությունը կներառի սոցիալական ցանցում բաժնեմասի գնում․ WSJ

ԱՄՆ-ում չինական TikTok սոցիալական ցանցի գործունեության պայմանագրի պայմանները նախատեսում են, որ ծառայության բաժնեմասի գնում պետք է իրականացվի ներդրողների կոնսորցիումի կողմից, հաղորդում է The Wall Street Journal-ը՝ հղում անելով ԱՄՆ վարչակազմի անանուն պաշտոնյայի։

Ըստ տեղեկությունների՝ գործարքի ընդհանուր պայմանները նման են այն պայմաններին, որոնք կողմերը քննարկել էին ապրիլին կայացած բանակցություններում։ Միևնույն ժամանակ, պարբերականը նշում է, որ Blackstone ընկերությունը չի դառնա հնարավոր գործարքի մաս։

Ինչպես ավելի վաղ հայտարարել էր ԱՄՆ ֆինանսների նախարար Սքոթ Բեսենթը, ԱՄՆ նախագահ Դոնալդ Թրամփը և Չինաստանի նախագահ Սի Ծինփինը սեպտեմբերի 19-ին նախատեսված հեռախոսազրույցի ընթացքում կհաստատեն ԱՄՆ-ում չինական TikTok սոցիալական ցանցի հետագա աշխատանքի վերաբերյալ գործարքի վերջնական պայմանները։

ԱՄՆ նախկին նախագահ Ջո Բայդենի վարչակազմը հաստատել էր մի օրենք, որը պարտադրում էր TikTok-ը վաճառել կամ դադարեցնել դրա գործունեությունը երկրի տարածքում՝ մինչև ընթացիկ տարվա հունվարի 19-ը։ Հունվարի 20-ին երդմնակալությունից հետո Թրամփը հրամանագիր է ստորագրել, որի համաձայն՝ Միացյալ Նահանգներում այդ հարթակի արգելափակումը հետաձգվել է։ Հետագայում նա երկարացրել է այդ հետաձգումը։