ԱՄՆ-ն իր քաղաքացիներին կոչ է անում անհապաղ լքել Իրանը՝ նշելով Հայաստանը որպես հնարավոր ելքի ուղի

Դեսպանատունը խորհուրդ չի տալիս Իրանից հեռանալ Աֆղանստանի, Իրաքի կամ Պակիստանի հետ ցամաքային սահմաններով։

ԱՄՆ կառավարությունը կոչ է արել Իրանում գտնվող իր քաղաքացիներին «հենց հիմա հեռանալ» երկրից՝ Իրանում ստեղծված անվտանգության և ենթակառուցվածքային լուրջ խնդիրների ֆոնին։ Այդ մասին հաղորդագրություն է տարածվել Իրանում ԱՄՆ վիրտուալ դեսպանատան պաշտոնական կայքում։

Հաղորդագրության մեջ նշվում է, որ երկրում հակակառավարական ցույցերը մեծ թափ են ստացել, սահմանափակվել կամ ամբողջությամբ խափանվել է ինտերնետի հասանելիությունը, փակվել են մի շարք ճանապարհներ, իսկ ավիաընկերությունները կրճատել կամ չեղարկել են թռիչքները դեպի Իրան և Իրանից դուրս։

Դեսպանատունը ԱՄՆ քաղաքացիներին հորդորում է ունենալ Իրանից հեռանալու ծրագիր, որը չի հիմնվում ԱՄՆ կառավարության օգնության վրա, և, հեռանալու անհնարինության դեպքում, գտնել անվտանգ ապաստարան բնակարանի կամ այլ շենքի ներսում, ինչպես նաև խուսափել հանրային հավաքներից և ցույցերից։

Հաղորդագրությունում ընդգծվում է, որ ԱՄՆ կառավարությունը չի կարող ապահովել Իրանը լքող քաղաքացիների անվտանգությունը։

Իրանից դուրս գալու հնարավոր տարբերակների թվում նշվում է նաև Հայաստանի Հանրապետությունը։ Ըստ դեսպանատան՝ 2026 թվականի հունվարի 12-ի դրությամբ բաց է Հայաստանի հետ ցամաքային սահմանը՝ Ագարակ/Նորդուզ անցակետով։ ԱՄՆ քաղաքացիներին խորհուրդ է տրվում, եթե անվտանգ է, դիտարկել ցամաքային ճանապարհով հեռանալու հնարավորությունը դեպի Հայաստան կամ Թուրքիա։

Նշվում է նաև, որ բաց են Թուրքմենստանի ցամաքային սահմաները, սակայն Ադրբեջանի տարածքով Իրանից դուրս գալու դեպքում ԱՄՆ քաղաքացիները պետք է հաշվի առնեն, որ լարված ժամանակաշրջաններում այդ մուտքը կարող է սահմանափակվել։ Որպես օրինակ հիշատակվում է 2025 թվականի հունիսին Իրանի և Իսրայելի միջև տեղի ունեցած հակամարտությունը։

Միևնույն ժամանակ, դեսպանատունը խորհուրդ չի տալիս Իրանից հեռանալ Աֆղանստանի, Իրաքի կամ Պակիստանի հետ ցամաքային սահմաններով։

Հիշեցվում է, որ Իրանում հակակառավարական ցույցերը սկսվել են դեկտեմբերի 28-ից՝ ազգային արժույթի կտրուկ արժեզրկման և բարձր գնաճի պայմաններում։ Իրավապաշտպան կազմակերպությունների տվյալներով՝ ցույցերի ընթացքում զոհերի թիվը գերազանցել է 600-ը, այդ թվում՝ իրավապահ մարմինների ներկայացուցիչներ։