ԱՄՆ-ն 2025 թվականին 2,5 մլն օտարերկրացու է արտաքսել

Արտաքսումների գրանցված թիվը «դեռ սկիզբն է»:

Միացյալ Նահանգները 2025 թվականի սկզբից 2,5 միլիոն օտարերկրացի է արտաքսել, որոնցից 1,9 միլիոնը կամավոր են լքել երկիրը ինքնաարտաքսման ծրագրով, իսկ 600 հազարը հարկադրաբար են արտաքսվել։ Այս մասին հայտնել է ԱՄՆ Ներքին անվտանգության նախարարությունը (ՆԱՆ)։

«600 հազար անօրինական ներգաղթյալներ արտաքսվել են մեր երկրի տարածքից՝ 365 օրից պակաս ժամանակահատվածում։ Ինքնաարտաքսումից օգտված 1,9 միլիոն անձանց հետ միասին, [ԱՄՆ-ը լքած] անօրինական ներգաղթյալների ընդհանուր թիվը գերազանցել է 2,5 միլիոնը», — ասված է նախարարության X-ի հաղորդագրության մեջ։

Ներքին անվտանգության նախարարությունը հավելել է, որ արտաքսումների գրանցված թիվը «դեռ սկիզբն է»։

Ավելի վաղ՝ հոկտեմբերին, ԱՄՆ ներքին անվտանգության նախարարի օգնական Թրիշա Մաքլաֆլինը հայտարարել է, որ ԱՄՆ նախագահ Դոնալդ Թրամփի երդմնակալության պահից ի վեր իրավապահ մարմինները ձերբակալել և արտաքսել են ավելի քան 500 հազար անօրինական միգրանտի, իսկ ևս 1,6 միլիոնն ինքնուրույն է լքել երկիրը։ Մաքլաֆլինն ընդգծել է, որ համապատասխան ամերիկյան մարմինները մտադիր են մեծացնել արտաքսումների տեմպերը։

Դոնալդ Թրամփը բազմիցս հայտարարել է, որ մինչև իր իշխանության գալը մոտ 25 միլիոն մարդ է անօրինական մուտք գործել երկիր։ Ամերիկյան առաջնորդը բազմիցս հանդես է եկել ներգաղթի քաղաքականության խստացման օգտին։ Երդմնակալությունից հետո նա հրամանագիր է ստորագրել Մեքսիկայի հետ ԱՄՆ սահմանին արտակարգ դրության ռեժիմ մտցնելու մասին։ Թրամփը նշել է, որ մտադիր է ապահովել անօրինական միգրանտների արտաքսման՝ ամերիկյան պատմության մեջ ամենախոշոր գործողության անցկացումը։