ԱՄՆ-ն դադարեցնում է 19 ոչ եվրոպական երկրներից ներգաղթի բոլոր դիմումները․ որ երկրներն են ընդգրկվել ցանկում

Վերջին օրերին Թրամփը նաև ուժեղացրել է սոմալիացիների դեմ հռետորաբանությունը։

ԱՄՆ նախագահ Դոնալդ Թրամփի վարչակազմը հայտարարել է, որ դադարեցնում է 19 ոչ եվրոպական երկրների ներգաղթյալների կողմից ներկայացված բոլոր ներգաղթային դիմումները, այդ թվում՝ «կանաչ քարտի» («Գրին քարտ») դիմումները և ԱՄՆ քաղաքացիության տրամադրման գործընթացը՝ ազգային անվտանգության և հասարակական անվտանգության վերաբերյալ մտահոգությունների ֆոնին։ Այս մասին հայտնում է Reuters-ը։

Դադարեցումը վերաբերում է 19 երկրներից ԱՄՆ մեկնած անձանց, որոնց հունիսին արդեն մասնակիորեն արգելվել էր մուտքը երկիր։

Նոր քաղաքականության պաշտոնական հուշագրում նշվում է նախորդ շաբաթ Վաշինգտոնում ԱՄՆ Ազգային գվարդիայի անդամների վրա կատարված հարձակումը, որի ժամանակ որպես կասկածյալ ձերբակալվել է մի աֆղանստանցի տղամարդ։ Կրակոցների ժամանակ զոհվել է Ազգային գվարդիայի մեկ զինծառայող, իսկ մյուսը՝ ծանր վիրավորվել։

Վերջին օրերին Թրամփը նաև ուժեղացրել է սոմալիացիների դեմ հռետորաբանությունը՝ նրանց անվանելով «աղբ» և նշելով. «Մենք չենք ուզում նրանց մեր երկրում»։

Դեկտեմբերի 3-ի հուշագրում թիրախային երկրների ցանկում են Աֆղանստանը, Մյանման, Չադը, Կոնգոյի Հանրապետությունը, Հասարակածային Գվինեան, Էրիթրեան, Հայիթին, Իրանը, Լիբիան, Սոմալին, Սուդանը և Եմենը, որոնք հունիսին ենթարկվել են ամենախիստ ներգաղթային սահմանափակումների, այդ թվում՝ մուտքի լիակատար կասեցման՝ մի քանի բացառություններով։

19 երկրների ցանկում, որոնք հունիսին ենթարկվել են մասնակի սահմանափակումների, ներառված են նաև Բուրունդին, Կուբան, Լաոսը, Սիեռա Լեոնը, Տոգոն, Թուրքմենստանը և Վենեսուելան։

Նոր քաղաքականությունը կասեցնում է ընթացի մեջ գտնվող դիմումները և պարտադրում, որ ցանկում ընդգրկված երկրներից բոլոր ներգաղթյալներն «անցնեն մանրակրկիտ վերստուգման գործընթաց, ներառյալ հնարավոր հարցազրույց և, անհրաժեշտության դեպքում, կրկնակի հարցազրույց՝ ազգային անվտանգության և հասարակական անվտանգության բոլոր սպառնալիքները լիարժեք գնահատելու համար»։