ԱՄՆ-ն ներկայացրել է Վենեսուելայի վերաբերյալ երեք փուլից բաղկացած ծրագիր

Ծրագրի երրորդ փուլը նախատեսում է իշխանության փոխանցում Վենեսուելայում։

ԱՄՆ-ն Վենեսուելայի համար նախատեսում է երեք փուլից բաղկացած գործողությունների ծրագիր, որը ներառում է երկրի կայունացում, վերականգնում և իշխանության փոխանցում։ Այդ մասին հայտարարել է ԱՄՆ պետքարտուղար Մարկո Ռուբիոն լրագրողների հետ զրույցում՝ Վենեսուելայի թեմայով սենատորների հետ հանդիպումից հետո։

Պետքարտուղարի խոսքով՝ ծրագրի առաջին փուլը նախատեսում է Վենեսուելայում իրավիճակի կայունացում՝ խուսափելու ներքաղաքական և սոցիալական քաոսից։ Այդ համատեքստում նշվել է, որ ԱՄՆ-ի հիմնական ազդեցության գործիքը մնում են նավթային սահմանափակումները։ Ռուբիոն հիշեցրել է, որ Վաշինգտոնը նախատեսում է վերցնել 30–50 միլիոն բարել վենեսուելական նավթ և այն իրացնել շուկայական գնով։ Ստացված միջոցները, ըստ ԱՄՆ պետքարտուղարի, պետք է բաշխվեն այնպես, որ օգտակար լինեն Վենեսուելայի բնակչության համար։

Երկրորդ փուլը, ըստ ներկայացված ծրագրի, վերաբերում է երկրի վերականգնմանը։ Այդ փուլում նախատեսվում է ապահովել ամերիկյան, արևմտյան և այլ միջազգային ընկերությունների մուտքը Վենեսուելայի շուկա՝ արդար մրցակցային պայմաններով։ Միաժամանակ նշվել է ազգային մակարդակով հաշտեցման գործընթացի մեկնարկի անհրաժեշտությունը, որը պետք է հնարավորություն տա ընդդիմադիր ուժերին համաներմամբ ազատ արձակվել կամ վերադառնալ երկիր, ինչպես նաև հիմք դնի քաղաքացիական հասարակության վերակառուցմանը։

Ծրագրի երրորդ փուլը նախատեսում է իշխանության փոխանցում Վենեսուելայում։

Նշվում է, որ հունվարի 3-ին Վենեսուելայի նախագահ Նիկոլաս Մադուրոյի և նրա կնոջ ձերբակալությունից և ԱՄՆ տեղափոխումից հետո Վաշինգտոնը շարունակում է շրջափակման մեջ պահել պատժամիջոցների տակ գտնվող վենեսուելական լցանավերը։ Հունվարի 7-ին ԱՄՆ-ն Ատլանտյան օվկիանոսում կալանել է նաև ռուսական դրոշի ներքո նավարկող «Մարիներա» լցանավը, որը կապվում է Վենեսուելայի հետ։