ԱՄՆ-ը նախատեսում է մինչև 100% մաքսատուրք դեղերի ներմուծման վրա

Այս քայլերը նպատակ ունեն խթանել արտադրության տեղայնացումը և վերաձևել ներմուծման քաղաքականությունը ԱՄՆ-ում։

ԱՄՆ նախագահ Դոնալդ Թրամփը հայտարարել է ներմուծվող որոշ դեղամիջոցների նկատմամբ մինչև 100% մաքսատուրք սահմանելու հնարավորության մասին՝ պայմանավորված արտադրության տեղայնացման պահանջներով։

Սպիտակ տան հրապարակած փաստաթղթի համաձայն՝ արտասահմանյան դեղագործական ընկերությունները պետք է համաձայնեն ԱՄՆ-ում արտադրություն հիմնել և նվազեցնել դեղատոմսային դեղերի գները՝ մաքսատուրքից խուսափելու համար։

Այն ընկերությունները, որոնք կհամաձայնեն այս պայմաններին, կենթարկվեն 20% մաքսատուրքի, իսկ պայմանները չկատարողները՝ մինչև 100% մաքսատուրքի։

Խոշոր դեղագործական ընկերություններին տրամադրվել է 120 օր, իսկ փոքրերին՝ 180 օր՝ պահանջները կատարելու համար։

Միաժամանակ որոշ երկրների՝ ԵՄ, Ճապոնիա, Հարավային Կորեա և Շվեյցարիա, համար մաքսատուրքը սահմանափակվելու է 15%-ով՝ գործող առևտրային համաձայնագրերի շրջանակում։

Նախաձեռնությունը նաև ներառում է մետաղների շուկան․ պահպանվում է պողպատի, ալյումինի և պղնձի ներմուծման 50% մաքսատուրքը, սակայն որոշ ապրանքների համար այն կիջեցվի մինչև 25% կամ կհանվի՝ կախված մետաղի պարունակությունից։

Այս քայլերը նպատակ ունեն խթանել արտադրության տեղայնացումը և վերաձևել ներմուծման քաղաքականությունը ԱՄՆ-ում։