ԱՄՆ-ի պետական ​​պարտքը ամեն վայրկյան ավելանում է 75,000 դոլարով

ԱՄՆ պետական պարտքն այս պահին գերազանցում է 38,5 տրիլիոն դոլարը

Անցնող տարում ԱՄՆ-ի պետական պարտքը յուրաքանչյուր վայրկյան աճում է 75 հազար դոլարով: Այս մասին նշվում է ԱՄՆ կառավարության ծախսերին նվիրված ամենամյա զեկույցում, որը պատրաստել է սենատոր Ռենդ Փոլը (հանրապետական Կենտուկի նահանգից):

Ըստ նրա գնահատականների՝ հաջորդ տասնամյակի ընթացքում ԱՄՆ-ն «տարեկան միջին հաշվով կավելացնի պարտքը 23,9 տրիլիոն դոլարով»: «ԱՄՆ կառավարությունը հաջորդ տասը տարիների ընթացքում ամեն օր պարտքն ավելացնելու է ավելի քան 6,53 միլիարդ դոլարով: Մենք պարտք ենք վերցնում ժամում ավելի քան 272 միլիոն դոլար, րոպեում՝ 4,54 միլիոն դոլար և յուրաքանչյուր վայրկյան՝ ավելի քան 75 հազար դոլար»,- նշում է սենատորը:

Նա «ծովում կաթիլ» է անվանել ԱՄՆ նախագահ Դոնալդ Թրամփի որոշումը՝ վերջին 50 տարվա ընթացքում առաջին անգամ «հրաժարվել 5 միլիարդ դոլարի չափով արտաքին օգնությունից և միջազգային կազմակերպությունների ֆինանսավորումից»՝ որպես ծախսերի դեմ պայքարի միջոց: Սենատորի հաշվարկներով՝ 2025 թվականին «պետական վատնումների ընդհանուր չափը կազմել է 1,639,135,969,608 դոլար, ներառյալ 1,22 տրիլիոն դոլարը՝ պարտքի տոկոսավճարների տեսքով»:

ԱՄՆ պետական պարտքն այս պահին գերազանցում է 38,5 տրիլիոն դոլարը, ինչը կազմում է ավելի քան 112 հազար դոլար երկրի յուրաքանչյուր բնակչի հաշվով: Ամերիկացի փորձագետների մեծ մասը հակված է այն մտքին, որ ամերիկյան բյուջեն հնարավոր է հավասարակշռել տասնամյա ժամկետում: Նրանք խորհուրդ են տալիս դաշնային ծախսերը կապել նախորդ երեք տարիների միջին տարեկան եկամտի հետ՝ հաշվի առնելով բնակչության աճն ու գնաճը: Մասնագետները մատնանշում են Կոնգրեսի՝ դաշնային բյուջեի ձևավորման հին խնդիրը, այն է՝ բացարձակապես բոլոր ծախսերն ու եկամուտները ներառող համապարփակ նախագծի բացակայությունը: Նրանք առաջարկում են կրճատել անհարկի ծախսերը, որոնք բեռ են դառնում հարկատուների համար: