ԱՄՆ պետական պարտքը գերազանցել է 39 տրիլիոն դոլարը

Վերջին ամիսներին պարտքի աճը շարունակական է եղել։

Միացյալ Նահանգների պետական պարտքը առաջին անգամ գերազանցել է 39 տրիլիոն դոլարը։ ԱՄՆ ֆինանսների նախարարության տվյալներով՝ մարտի 19-ի դրությամբ պարտքը կազմել է մոտ 39.02 տրիլիոն դոլար։

Վերջին ամիսներին պարտքի աճը շարունակական է եղել․ 38 տրիլիոն դոլարի շեմը հաղթահարվել է 2025 թվականի հոկտեմբերին, իսկ 37 տրիլիոնը՝ նույն տարվա օգոստոսին։

Կոնգրեսի բյուջետային վարչության (CBO) կանխատեսմամբ՝ պարտքը շարունակելու է աճել և 2036 ֆինանսական տարում կարող է հասնել 56.15 տրիլիոն դոլարի, ինչը համարժեք կլինի ՀՆԱ-ի մոտ 120%-ին։

Համեմատության համար՝ 2025 թվականին պարտքը կազմել է ՀՆԱ-ի շուրջ 99%-ը։

Կանխատեսվում է, որ 2030 թվականին պարտքը կհասնի ՀՆԱ-ի 108%-ին՝ գերազանցելով պատմական նախորդ ռեկորդը, որը գրանցվել էր 1946 թվականին։

Տվյալները ցույց են տալիս, որ պետական պարտքի աճը գերազանցում է տնտեսական աճի տեմպերը, ինչը երկարաժամկետում կարող է ազդել բյուջետային կայունության և ֆինանսական քաղաքականության վրա։