ԱՄՆ-ում ներկայացվել է նորածինների համար նախատեսված «Trump Family Investment Account» ծրագիրը

Սպիտակ տունը խրախուսել է ընտանիքներին և մասնավոր հատվածին կատարել հավելյալ ներդրումներ այս հաշիվներում։

Հունվարի 28-ին ԱՄՆ նախագահ Դոնալդ Թրամփը ներկայացրել է նորածինների համար նախատեսված «Trump Family Investment Account» (ընտանեկան ներդրումային հաշիվ) ծրագիրը։ Միջոցառման ընթացքում նա կոչ է արել ամերիկյան ընկերություններին ներդրումներ կատարել իրենց աշխատակիցների ընտանիքների ֆինանսական ապագայի մեջ։

Reuters-ի փոխանցմամբ՝ ծրագիրը հիմնվել է նախորդ տարի Հանրապետական կուսակցության կողմից ընդունված հարկային և ծախսային օրենսդրական փաթեթի շրջանակում։ Այն նախատեսվում է գործարկել փուլային եղանակով՝ առաջիկա երեք տարիների ընթացքում։

ԱՄՆ ֆինանսների նախարարության տվյալներով՝ 2025-2028 թվականներին ծնված յուրաքանչյուր երեխայի համար կբացվի ներդրումային հաշիվ, որի մեկնարկային գումարը կկազմի 1 000 դոլար։ Ծրագրից օգտվելու իրավունք կունենա մոտ 25 միլիոն ընտանիք։

Կառավարության փոխանցմամբ՝ այդ միջոցները կտեղաբաշխվեն ցածր ծախսատարությամբ ինդեքսային ֆոնդերում։ Եկամուտները հարկման կենթարկվեն միայն միջոցների դուրսբերման դեպքում՝ ապահովելով հարկային հետաձգում ներդրումների աճի ընթացքում։

Պաշտոնական հաշիվների գործարկումը նախատեսված է 2026 թվականի հուլիսի 4-ին։ Ֆինանսների նախարար Սքոթ Բեսենթի տվյալներով՝ ծրագրին նախնական փուլում արդեն գրանցվել է ավելի քան կես միլիոն ընտանիք։

Սպիտակ տունը խրախուսել է ընտանիքներին և մասնավոր հատվածին կատարել հավելյալ ներդրումներ այս հաշիվներում։ Ըստ հրապարակված տվյալների՝ ձեռնարկատեր Մայքլ Դելը և նրա կինը՝ Սյուզանը, ծրագրի շրջանակում իրականացրել են բազմամիլիարդանոց ներդրում։

Սպիտակ տան գնահատմամբ՝ առանց լրացուցիչ ներդրումների հաշիվներում կկուտակվի մոտ 5 800 դոլար մինչև երեխայի չափահաս դառնալը։ Միևնույն ժամանակ, անկախ ֆինանսական վերլուծաբանների գնահատականներով՝ առավելագույն տարեկան ներդրումների դեպքում կուտակված գումարի ծավալը կարող է զգալիորեն տարբերվել վարչակազմի ներկայացրած կանխատեսումներից։