Դեղերի համար ԱՄՆ-ի մաքսատուրքերը չեն անդրադառնա ԵՄ-ի արտադրանքին․ DPA

Մայիսի 12-ին Թրամփը ստորագրեց գործադիր հրամանագիր, որով ԱՄՆ-ում դեղերի գները նվազեցվեցին 59-90%-ով։

Եվրամիությունից Միացյալ Նահանգներ ներմուծվող դեղագործական արտադրանքը կազատվի ԱՄՆ նոր մաքսային տուրքերից, հաղորդում է DPA լրատվական գործակալությունը՝ հղում անելով ԱՄՆ կառավարության աղբյուրներին։

Գործակալության զրուցակցի խոսքով՝ Սպիտակ տունը հավատարիմ է ԵՄ-ից ներմուծման համար համաձայնեցված 15-տոկոսանոց մաքսային սակագնային շեմին, որը տարածվում է նաև դեղագործական արտադրանքի վրա։ Ավելի վաղ Եվրահանձնաժողովը ենթադրում էր, որ Գերմանիան և ԵՄ այլ երկրներ կազատվեն նոր ամերիկյան մաքսատուրքերից։

Սեպտեմբերի 25-ին ԱՄՆ նախագահ Դոնալդ Թրամփը հայտարարել էր, որ Վաշինգտոնը հոկտեմբերի 1-ից 100% մաքսատուրքեր կսահմանի դեղագործական արտադրանքի վրա։ Նա հավելել էր, որ բացառություններ կարվեն այն արտադրող ընկերությունների համար, որոնք արդեն իսկ սկսել են իրենց գործարանների կառուցումն ԱՄՆ տարածքում։

Մայիսի 12-ին Թրամփը ստորագրեց գործադիր հրամանագիր, որով ԱՄՆ-ում դեղերի գները նվազեցվեցին 59-90%-ով։ Մամուլի ասուլիսում նա հայտարարեց, որ մաքսատուրքեր կսահմանի ներմուծվող դեղերի վրա, եթե ԱՄՆ-ում գները չհամապատասխանեն այլ երկրների գներին։