ԱՄՆ-ը ավարտել է Վենեսուելային նավթի վաճառքից ստացված 500 մլն դոլարի փոխանցումը

Վենեսուելան ամբողջությամբ ստացել է այն գումարը, որը գոյացել էր վենեսուելական նավթի առաջին խմբաքանակի վաճառքի արդյունքում։

Վաշինգտոնի վարչակազմն ավարտել է Վենեսուելայի իշխանություններին նավթի վաճառքից ստացված 500 միլիոն դոլարի փոխանցումը։ Այդ մասին երեքշաբթի օրը հայտնել է Reuters գործակալությունը՝ հղում անելով ԱՄՆ պաշտոնատար անձանցից մեկին։

Պաշտոնյայի խոսքով՝ Վենեսուելան ամբողջությամբ ստացել է այն գումարը, որը գոյացել էր վենեսուելական նավթի առաջին խմբաքանակի վաճառքի արդյունքում։ Միևնույն ժամանակ նշվել է, որ միջոցների բաշխումը նախատեսվում է իրականացնել «վենեսուելացի ժողովրդի շահերից ելնելով»՝ ԱՄՆ կառավարության կողմից սահմանվող մեխանիզմների շրջանակում։ Վաճառված նավթի ծավալները չեն հստակեցվել։

Աղբյուրի տվյալներով՝ Վաշինգտոնը նախատեսում է ապագայում վենեսուելական նավթի վաճառքից ստացված միջոցները փոխանցել ԱՄՆ-ում տեղակայված հատուկ հիմնադրամի։ Այդ հիմնադրամից գումարների փոխանցումը Վենեսուելայի իշխանություններին կիրականացվի ամերիկյան կողմի թույլտվությամբ։

Վենեսուելայի լիազոր նախագահ Դելսի Ռոդրիգեսը հունվարի վերջին հայտնել էր, որ երկիրը ստացել է նավթի վաճառքից գոյացած գումարի առաջին 300 միլիոն դոլարը։ Reuters-ի հրապարակման համաձայն՝ ԱՄՆ-ն այժմ փոխանցել է նաև մնացած 200 միլիոն դոլարը, ինչի արդյունքում վճարումը ավարտված է համարվում։