ԱՄՆ-ի 250-ամյակի առթիվ Պետդեպարտամենտը պատրաստում է Թրամփի պատկերով հոբելյանական անձնագրեր

Հետևի մասում նախատեսված է ամերիկյան դրոշի պատկեր՝ ոսկեգույն լամինացմամբ և 250 թվով։

ԱՄՆ Պետդեպարտամենտը հայտնել է երկրի 250-ամյակի առթիվ սահմանափակ թողարկմամբ հոբելյանական անձնագրերի պատրաստման մասին, որոնցում առաջին անգամ կօգտագործվի գործող նախագահ Դոնալդ Թրամփի պատկերը։ Ինչպես գրում է AP-ն, նա կդառնա ներկայումս կենդանի ամերիկացի առաջնորդներից առաջինը, որի դեմքը կհայտնվի այս փաստաթղթում։

Հատուկ անձնագրի հայեցակարգը քննարկվել է մի քանի ամիս և հաստատվել է երկուշաբթի երեկոյան։ Տպաքանակը կկազմի 25 հազարից 30 հազար օրինակ։ Հոբելյանական անձնագրերը հասանելի կլինեն այն դիմորդներին, որոնք հուլիսի 4-ից անձամբ կձևակերպեն փաստաթղթերը Վաշինգտոնի անձնագրային գրասենյակում։ Նրանք, ովքեր կցանկանան ստանալ ստանդարտ անձնագիր, կարող են այն ձևակերպել առցանց կամ այլ գրասենյակներում։

Պետդեպարտամենտի մամուլի քարտուղար Թոմի Պիգոտը հայտնել է, որ շարքը կունենա անհատական դիզայն՝ միաժամանակ պահպանելով պաշտպանության բոլոր ստանդարտ տարրերը։ Հուշային անձնագրի ներսում կտեղադրվի նախագահի պատկերը՝ ոսկեգույն ստորագրության վրա, իսկ շապիկի վրա խոշոր ոսկեգույն տառերով կնշվեն երկրի անվանումը և «Անձնագիր» բառը։

Ինչպես նշում է AP-ն, ժամանակակից ամերիկյան անձնագրերում արդեն առկա են Ջորջ Վաշինգտոնի, Թոմաս Ջեֆերսոնի, Թեոդոր Ռուզվելտի և Աբրահամ Լինքոլնի պատկերները, ինչպես նաև խորհրդանշական օբյեկտներ՝ Ազատության արձանը, Ազատության զանգը և Անկախության սրահը։