Առաջիկա օրերին օդի որակը դարձյալ վատթարանալու է․ որն է պատճառը

Օդի որակի բարելավումը կրկին պայմանավորված է բնակլիմայական պայմաններով։

Գայթակղությունը մեծ է ասելու, որ մեր քրտնաջան աշխատանքի շնորհիվ է Երևանում օդի որակը բարելավվել, բայց պետք է լինել ազնիվ և ասել, որ իրականում Երևանում օդի որակի վրա մարդկային գործոնի ազդեցությունը չնչին է։ Այս մասին այսօր՝ ապրիլի 6–ին, Երևանի քաղաքապետարանի հերթական գործակարգավորական խորհրդակցության ընթացքում ասաց Երևանի քաղաքապետ Տիգրան Ավինյանը։

«Իրականում օդի որակի բարելավումը կրկին պայմանավորված է բնակլիմայական պայմաններով, մասնավորապես՝ տարածաշրջանում մթնոլորտային շերտի բարձրությամբ։ Այդ մթնոլորտային շերտը, ցավոք, կամ բարեբախտաբար, չենք կարողանում կառավարել»,-ասաց Ավինյանը՝ նշելով, թե, ըստ կանխատեսումների, առաջիկա օրերին օդի որակը դարձյալ վատթարանալու է և դա պայմանավորված է մթնոլորտային առաստաղի ցածրությամբ։