ՄԱԿ-ի 2026-ի բյուջեն կկրճատվի 500 մլն դոլարով

ՄԱԿ-ն ավարտել է 2026-ի բյուջեի գնահատման վերանայումը: Առաջարկվում է ծախսերը կրճատել ավելի քան 500 մլն դոլարով:

ՄԱԿ-ի գլխավոր քարտուղար Անտոնիու Գուտերիշը կազմակերպության անդամ-երկրներին հղած նամակում առաջարկել է 2026-ի բյուջեն կրճատել 15%-ով՝ համեմատած 2025-ի: Այս մասին, համաձայն b24.am կայքի, հայտնում է ՄԱԿ-ի մամուլի ծառայությունը։

«ՄԱԿ-ն ավարտել է 2026-ի բյուջեի գնահատման վերանայումը: Առաջարկվում է ծախսերը կրճատել ավելի քան 500 մլն դոլարով», – նշվում է հաղորդագրության մեջ։

Գուտերիշը նշել է, որ ռեսուրսների բաշխման վերլուծության ժամանակ պահպանվել է հավասարակշռությունը ՄԱԿ-ի կանոնադրության երեք հենասյուների միջև՝ խաղաղություն և անվտանգություն, մարդու իրավունքներ, կայուն զարգացում։

Կրճատումները կանդրադառնան նաև խաղաղապահ առաքելությունների աջակցման բյուջեին։

Այլ առաջարկների թվում նշվում է մի շարք գործառույթների տեղափոխումը Նյու Յորքից և Ժնևից դեպի ավելի ցածր ծախսերով վայրեր։

Մինչև 2027 թվականը ՄԱԿ-ը մտադիր է դադարեցնել Նյու Յորքում երկու շենքերի վարձակալությունը։

ՄԱԿ-ի վարչական և բյուջետային հարցերի խորհրդատվական կոմիտեն կքննի այս առաջարկները շաբաթվա ընթացքում։ Այնուհետև կոմիտեն կներկայացնի առաջարկությունները Գլխավոր ասամբլեայի Հինգերորդ կոմիտեին, որտեղ բոլոր 193 անդամ-պետությունները կընդունեն վերջնական որոշում։ Սպասվում է, որ դա տեղի կունենա մինչև տարեվերջ։

Լրացուցիչ խնդիր ՄԱԿ-ի համար դարձել է ԱՄՆ-ում Դոնալդ Թրամփի վերադարձը իշխանության․ նա բազմիցս հայտարարել է, որ ՄԱԿ-ը համարում է ոչ արդյունավետ կառույց և չի ցանկանում մեծ ծախսեր կատարել դրա վրա։