Թուրքիայում ձերբակալվել են տասնյակից ավելի թուրք հայտնիներ․ նրանց թվում է նաև «Եվրատեսիլ 2009»-ի մասնակից Հադիսեն

Ստամբուլի ոստիկանությունն այսօր առավոտյան իրականացրել է լայնածավալ գործողություն, որի ընթացքում ձերբակալվել են մի քանի հայտնի մարդիկ։

Ինչպես հաղորդում են թուրքական լրատվամիջոցները, նրանց թվում են «Եվրատեսիլ 2009»-ի մասնակից, հայտնի երգչուհի Հադիսեն, երգչուհի Իրեմ Դերիջին, ինչպես նաև այլ հայտնի երգիչներ, դերասաններ և բլոգերներ։

Ըստ հրապարակված տեղեկությունների՝ գործողությունը տեղի է ունեցել Ստամբուլի գլխավոր դատախազության նախաձեռնությամբ՝ թմրանյութերի կամ խթանիչ նյութերի օգտագործման գործով սկսված հետաքննության շրջանակներում։ Դատախազությունը հրահանգ է տվել ձերբակալվածներից վերցնել արյան նմուշներ՝ ուսումնասիրելու հնարավոր օգտագործումը։

Թուրքական մամուլում հաղորդվում է, որ սա եղել է համաժամանակյա գործողություն՝ մի քանի վայրերում իրականացված ոստիկանության հսկողությամբ։ Այս պահին պաշտոնական մարմինները մանրամասներ չեն հայտնել՝ թե քանի մարդ է ձերբակալվել և ինչ փուլում է գտնվում քննությունը։

Դատախազությունը և ոստիկանությունը դեռևս չեն հրապարակել պաշտոնական հայտարարություն առ այն, թե արդյոք նշված հայտնի անձինք մեղադրվում են որևէ հանցանքի մեջ։

Հետաքննությունը շարունակվում է։