ՏՏ ընկերությունների թիվը Հայաստանում 2017-ի համեմատ աճել է 18,5 անգամ

Ոլորտի շրջանառությունը ևս զգալի աճ է գրանցել։

Հայաստանում տեղեկատվական տեխնոլոգիաների ոլորտում գործունեություն իրականացնող ընկերությունների թիվը 2017 թվականի համեմատ աճել է 18,5 անգամ։ Այդ մասին ամփոփիչ ասուլիսի ժամանակ հայտարարել է բարձր տեխնոլոգիական արդյունաբերության նախարար Մխիթար Հայրապետյանը։

Նախարարի խոսքով՝ 2017 թվականին ՏՏ ոլորտում գործել է 650 ընկերություն, 2024 թվականին դրանց թիվը հասել է 8396-ի, իսկ 2025 թվականին՝ 12.026-ի։

Աշխատակիցների թվի առումով 2017 թվականին ոլորտում զբաղված է եղել 15.350 մարդ։ 2024 թվականին այդ թիվը կազմել է 41.541, իսկ 2025 թվականին՝ 41.431։ 2025 թվականին 2017-ի համեմատ աճը կազմել է 2,6 անգամ։

Ոլորտի շրջանառությունը ևս զգալի աճ է գրանցել։ Եթե 2017 թվականին այն կազմել է 306 մլրդ 40 մլն դրամ, ապա 2024 թվականին՝ 915 մլրդ 800 մլն դրամ, իսկ 2025 թվականին գերազանցել է 1 տրիլիոն դրամը։ 2017 թվականի համեմատ 2025 թվականին աճը կազմել է 3,2 անգամ։

Արտահանման ցուցանիշները ևս բազմապատկվել են։ 2017 թվականին արտահանումների ընդհանուր ծավալը կազմել է 135 մլրդ 440 մլն դրամ, 2024 թվականին՝ 702 մլրդ 102 մլն դրամ, իսկ 2025 թվականին՝ 711 մլրդ 500 մլն դրամ։ 2025 թվականին 2017 թվականի համեմատ աճը կազմել է 5,2 անգամ։