Թրամփը 25% մաքսատուրք է սահմանում Իրանի հետ բիզնես վարող երկրների նկատմամբ

Որոշումը ուժի մեջ է մտնում անմիջապես:

ԱՄՆ նախագահ Դոնալդ Թրամփը հայտարարել է, որ Իրանի Իսլամական Հանրապետության հետ բիզնես վարող երկրները կկիրառվեն 25% մաքսատուրքի, երբ գործարքներ իրականացնեն Ամերիկայի Միացյալ Նահանգների հետ։ Հայտարարությունը նախագահը կատարել է Truth Social սոցիալական հարթակում։

Թրամփի խոսքով՝ որոշումը ուժի մեջ է մտնում անմիջապես և վերաբերում է ԱՄՆ-ի հետ կատարվող «ցանկացած և բոլոր գործարքներին»։ Նա ընդգծել է, որ որոշումը վերջնական և վճռորոշ է։

Ավելի վաղ ԱՄՆ նախագահը հայտարարել էր, որ իր վարչակազմը դիտարկում է Իրանի նկատմամբ տարբեր քաղաքական և ուժային տարբերակներ՝ ի պատասխան երկրում շարունակվող ցույցերի ճնշման, որի ընթացքում, ըստ միջազգային լրատվամիջոցների, զոհվել է ավելի քան 500 մարդ։

CNN-ի փոխանցմամբ՝ մաքսատուրքերի սահմանումը կարող է զգալի ազդեցություն ունենալ Չինաստանի վրա, որը համարվում է Իրանի խոշորագույն առևտրային գործընկերներից մեկը և միաժամանակ ունի լայն առևտրաշրջանառություն ԱՄՆ-ի հետ։ Լրատվամիջոցի գնահատմամբ՝ նոր մեխանիզմի կիրառման դեպքում Չինաստանի համար ԱՄՆ արտահանման մաքսատուրքը կարող է հասնել մինչև 45%, ներկայիս մոտ 20%-ի փոխարեն։

Բացի Չինաստանից, Իրանի խոշոր առևտրային գործընկերների թվում նշվում են նաև Հնդկաստանը, Արաբական Միացյալ Էմիրությունները և Թուրքիան։

Սպիտակ տունը հրաժարվել է CNN-ին տրամադրել լրացուցիչ մանրամասներ՝ նշելով, որ դեռևս պարզ չէ, թե նոր մաքսատուրքերը կվերաբերեն միայն ապրանքների առևտրին, թե նաև ծառայություններին, ինչպես նաև՝ կիրառման տեխնիկական մեխանիզմները։