Թրամփը «հիասթափված» է Պուտինից

ԱՄՆ նախագահ Դոնալդ Թրամփը մեկ անգամ ևս հայտարարել է, որ «շատ հիասթափված է» իր ռուս գործընկեր Վլադիմիր Պուտինից` Ուկրաինայում շարունակվող պատերազմի պատճառով:

«Հազարավոր մարդիկ մահանում են անիմաստ պատերազմում: Պետք է ինչ-որ բան անել, որպեսզի օգնենք մարդկանց ապրել: Եթե ես կարող եմ դադարեցնել պատերազմը, կարծում եմ, որ պարտավոր եմ դա անել»,- ասել է Սպիտակ տան ղեկավարը սեպտեմբերի 2-ին ամերիկացի լրագրող Սքոթ Ջենինգսի հետ ռադիոհարցազրույցում:

Օգոստոսի 22-ին ԱՄՆ նախագահը խոստացել է երկու շաբաթից որոշել՝ Ռուսաստանի դեմ «մեծ պատժամիջոցներ» կկիրառի՞, թե՞ «ոչինչ չի անի»։ Այս վերջին վերջնագրի ժամկետը լրանում է սեպտեմբերի 5-ին։

Նույն հարցազրույցում Թրամփն ընդգծել է, որ իրեն բոլորովին չի մտահոգում այն փաստը, որ Չինաստանն ու Ռուսաստանը կարող ենք միավորվել ընդդեմ ԱՄՆ-ի:

«Մենք, անկասկած, ունենք աշխարհի ամենաուժեղ բանակը: Նրանք երբեք իրենց բանակը չեն օգտագործի մեր դեմ: Հավատացեք ինձ»,- ասել է ԱՄՆ նախագահը:

Ավելի վաղ նույն օրը Պուտինը և Չինաստանի նախագահ Սի Ծինփինը բանակցություններ են վարել Չինաստանում: