Թրամփը գործարկել է 10% գլոբալ ներմուծման մաքսատուրքեր

Սպիտակ տունը հայտնել է, որ 10% մաքսատուրքերը չեն տարածվի որոշ ապրանքների վրա, այդ թվում՝ Կանադայից և Մեքսիկայից ներմուծվող ապրանքների։

ԱՄՆ նախագահ Դոնալդ Թրամփը գործողության մեջ է դրել 10 տոկոսի չափով նոր գլոբալ ներմուծման մաքսատուրքերը՝ հանգստյան օրերին հայտարարված 15 տոկոսի փոխարեն։ Այս մասին գրում է Financial Times-ը՝ վկայակոչելով ամերիկյան մաքսատան ծանուցումը։

Սակագները սկսել են գործել երեքշաբթի օրը՝ երկրի արևելյան ափի ժամանակով ժամը 00:01-ից։ ԱՄՆ մաքսային և սահմանային պահպանության ծառայությունը ներմուծողներին տեղեկացրել է, որ առաջին փուլում դրույքաչափը կկազմի 10% և կկիրառվի բոլոր երկրների նկատմամբ՝ 150 օրվա ընթացքում, եթե բացառություններ չնախատեսվեն։

Սպիտակ տանը հաստատել են տեղեկությունը՝ նշելով, որ վարչակազմն աշխատում է մաքսատուրքերը մինչև 15% բարձրացնելու ուղղությամբ, սակայն դրա համար անհրաժեշտ կլինի առանձին հրամանագիր։

ԱՄՆ Գերագույն դատարանը ուրբաթ օրը որոշել էր, որ 2025 թվականին բազմաթիվ երկրների նկատմամբ մաքսատուրքեր սահմանելու Թրամփի նախորդ որոշումն անօրինական է։ Ի պատասխան՝ նախագահը կիրառել է 1974 թվականի «Առևտրի մասին» օրենքը, որը թույլ է տալիս 150 օր ժամկետով նման սակագներ սահմանել։

Սպիտակ տունը հայտնել է, որ 10% մաքսատուրքերը չեն տարածվի որոշ ապրանքների վրա, այդ թվում՝ Կանադայից և Մեքսիկայից ներմուծվող ապրանքների։

Վաշինգտոնի քաղաքականության փոփոխությունը մտահոգություն է առաջացրել ԱՄՆ առևտրային գործընկերների շրջանում։ Սակայն մինչև 15% բարձրացման հնարավոր դադարը կարող է ժամանակ տրամադրել երկրներին և բիզնեսին՝ բացառություններ կամ արտոնություններ ստանալու համար։