Թրամփը Իրանին տվել է 10-15 օր՝ միջուկային ծրագրի շուրջ համաձայնության հասնելու համար

ԱՄՆ նախագահը քննարկում է Իրանի նկատմամբ գործողությունների մի շարք տարբերակներ։

ԱՄՆ նախագահ Դոնալդ Թրամփը հայտարարել է, որ Իրանն ունի 10-15 օր՝ Վաշինգտոնի հետ իր միջուկային ծրագրի վերաբերյալ համաձայնության հասնելու համար։

Ամերիկացի առաջնորդը կրկին զգուշացրել է, որ Իրանի հետ «շատ վատ բաներ տեղի կունենան», եթե համաձայնություն ձեռք չբերվի։ «Մենք այս կամ այն կերպ կստանանք գործարքը»,- հավելել է Թրամփը։

The Wall Street Journal-ը, հղում անելով իր աղբյուրներին, հաղորդում է, որ ԱՄՆ նախագահը քննարկում է Իրանի նկատմամբ գործողությունների մի շարք տարբերակներ, այդ թվում՝ սահմանափակ հարվածների հնարավորությունը՝ Թեհրանին միջուկային գործարք կնքելու համար ճնշում գործադրելու նպատակով։

Պարբերականի տվյալներով՝ եթե նման որոշում կայացվի, հարվածները կարող են իրականացվել առաջիկա օրերին և թիրախավորել մի քանի ռազմական կամ կառավարական օբյեկտներ։

WSJ-ն նաև նշում է, որ եթե Իրանը շարունակի չկատարել ուրանի հարստացումից հրաժարվելու պահանջը, ԱՄՆ-ը կարող է դիմել ավելի լայնածավալ գործողությունների, որոնք, ըստ հրապարակման, կարող են ներառել նաև Թեհրանում իշխանափոխության նպատակ հետապնդող սցենարներ։

Պաշտոնական Թեհրանը նախկինում հայտարարել է, որ իր միջուկային ծրագիրը բացառապես խաղաղ նպատակներ է հետապնդում։