Թրամփը հայտարարել է, որ դեռ վաղ է խոսել Իրանում Փահլավիին աջակցելու մասին

Ցանկացած ռեժիմ կարող է տապալվել:

ԱՄՆ նախագահ Դոնալդ Թրամփը հայտարարել է, որ ներկայում վաղաժամ է քննարկել Իրանի վերջին շահի ավագ որդու՝ Ռեզա Փահլավիի հնարավոր քաղաքական դերի և Իրանում աջակցություն ստանալու հեռանկարի հարցը։ Այդ մասին նա ասել է Reuters գործակալությանը տված հարցազրույցում։

Թրամփի խոսքով՝ Փահլավին «լավ տպավորություն է թողնում», սակայն պարզ չէ, թե ինչպիսի ընդունելություն կունենա Իրանում։
«Ես չգիտեմ, թե նա ինչպես կընդունվեր իր իսկ երկրում, և իրականում մենք դեռ այդ փուլում չենք», – նշել է ԱՄՆ նախագահը՝ հավելելով, որ իրավիճակի շուրջ դեռևս բազմաթիվ հարցեր են ուսումնասիրվում։

Անդրադառնալով Իրանում իշխանափոխության հնարավորությանը՝ Թրամփը նշել է, որ «ցանկացած ռեժիմ կարող է տապալվել», սակայն ընդգծել է, որ դեռ վաղ է կոնկրետ սցենարների մասին խոսելը։ Նրա խոսքով՝ անկախ զարգացումներից, Իրանի շուրջ ստեղծված իրավիճակը «հետաքրքիր ժամանակաշրջան» է խոստանում։

Ռեզա Փահլավին ծնվել է 1960 թվականին Թեհրանում, 1967 թվականին ստացել է թագաժառանգի տիտղոս։ 1979 թվականի Իսլամական հեղափոխությունից հետո Իրանում միապետության տապալման հետևանքով Փահլավիների ընտանիքը լքել է երկիրը։ 1980 թվականին հոր մահից հետո Ռեզա Փահլավին գլխավորել է Փահլավիների տունը և հանդես է գալիս որպես իրանական ներկայիս իշխանությունների ընդդիմադիր։ Նա բնակվում է ԱՄՆ-ում և գլխավորում է Իրանի ազգային խորհուրդը, որի գործունեությունն արգելված է Իրանում։