Թրամփը հաստատել է ԱՄՆ պաշտպանական բյուջեն՝ 900 միլիարդ դոլարի չափով

ԱՄՆ Ներկայացուցիչների պալատն օրինագիծն ընդունել էր անցյալ շաբաթ։

ԱՄՆ նախագահ Դոնալդ Թրամփը ստորագրել է 2026 թվականի ֆինանսական տարվա համար 900 միլիարդ դոլարի չափով պաշտպանական բյուջեի մասին օրինագիծը: Այս մասին հայտարարել է Սպիտակ տունը։

«Այս փաստաթուղթը Պատերազմի նախարարությանը հնարավորություն կտա իրականացնել իմ «Խաղաղություն՝ ուժի միջոցով» ծրագիրը, պաշտպանել երկիրը ներքին ու արտաքին սպառնալիքներից և ամրապնդել պաշտպանական- արդյունաբերական բազան՝ միաժամանակ դադարեցնելով վատնող և արմատական ​​ծրագրերի ֆինանսավորումը», - նշել է Թրամփը հայտարարության մեջ։

Նրա խոսքով՝ փաստաթուղթը կանոնակարգում է ԱՄՆ վարչակազմի կողմից արդեն ձեռնարկվող գործողությունները, որոնք ուղղված են, ի թիվս այլ բաների, «Ոսկե գմբեթ» հակահրթիռային պաշտպանության համակարգի զարգացմանը։ 

Դեկտեմբերի 17-ին ԱՄՆ Սենատը հավանություն էր տվել պաշտպանական բյուջեի օրինագծին, որին կողմ էր քվեարկել 77 սենատոր, դեմ՝ 20-ը։ Փաստաթուղթը նախատեսում է զինծառայողների աշխատավարձի բարձրացում, Չինաստանում ամերիկյան ներդրումների սահմանափակումներ, Սիրիայի նկատմամբ սահմանված պատժամիջոցների չեղարկում և Կիևին 400 միլիոն դոլարի չափով ռազմական օգնության հատկացում։

ԱՄՆ Ներկայացուցիչների պալատն օրինագիծն ընդունել էր անցյալ շաբաթ։