Թրամփը հայտարարել է հարավկորեական ապրանքների մաքսատուրքերի բարձրացման մասին

Կորեայի խորհրդարանը չի վավերացրել համաձայնագիրը։

ԱՄՆ նախագահ Դոնալդ Թրամփը հայտարարել է հարավկորեական ապրանքների նկատմամբ կիրառվող մաքսատուրքերի բարձրացման մասին։ Հայտարարությունը հրապարակվել է նրա TruthSocial սոցիալական հարթակի էջում։

Թրամփի փոխանցմամբ՝ մաքսատուրքերը բարձրացվում են 15 տոկոսից մինչև 25 տոկոս։ Փոփոխությունը վերաբերում է Հարավային Կորեայից ներմուծվող ավտոմեքենաներին, փայտանյութին, դեղագործական արտադրանքին, ինչպես նաև փոխադարձ մաքսատուրքերի ենթակա այլ ապրանքներին։

Սպիտակ տունը հայտնել է, որ որոշման հիմքում ընկած է հարավկորեական օրենսդիր մարմնի կողմից Վաշինգտոնի հետ կնքված առևտրային համաձայնագրով ստանձնած պարտավորությունների չկատարումը։ Մասնավորապես նշվում է, որ Կորեայի խորհրդարանը չի վավերացրել համաձայնագիրը։

Ներկայացված որոշումը դիտարկվում է որպես ԱՄՆ–Հարավային Կորեա առևտրատնտեսական հարաբերություններում մաքսային ռեժիմի խստացում։