Թրամփը հայտարարում է Կանադայում արտադրված ինքնաթիռների հավաստագրերի չեղարկման մասին

Թրամփի հայտարարության համաձայն՝ որոշման հիմքում ընկած է Կանադայի կողմից Gulfstream 500, 600, 700 և 800 ինքնաթիռների հավաստագրման մերժումը։

ԱՄՆ նախագահ Դոնալդ Թրամփը սոցիալական ցանցերում հայտարարություն է հրապարակել, ըստ որի՝ Միացյալ Նահանգները չեղարկում է Bombardier Global Express ինքնաթիռների, ինչպես նաև Կանադայում արտադրված բոլոր ինքնաթիռների հավաստագրերը։

Թրամփի հայտարարության համաձայն՝ որոշման հիմքում ընկած է Կանադայի կողմից Gulfstream 500, 600, 700 և 800 ինքնաթիռների հավաստագրման մերժումը։ ԱՄՆ նախագահի խոսքով՝ այդ մոդելները հանդիսանում են երբևէ արտադրված ամենամեծ և տեխնոլոգիապես ամենաառաջադեմ ինքնաթիռներից, սակայն Կանադան տարիներ շարունակ հրաժարվել է դրանք հավաստագրել։

Հայտարարությունում նշվում է, որ հավաստագրերի չեղարկումը ուժի մեջ կմնա մինչև Gulfstream ընկերության արտադրանքը Կանադայում լիարժեք հավաստագրվի։ Թրամփը նաև պնդել է, որ Կանադան հավաստագրման գործընթացի միջոցով փաստացի սահմանափակում է Gulfstream-ի արտադրանքի վաճառքը երկրի տարածքում։

ԱՄՆ նախագահը հավելել է, որ եթե ստեղծված իրավիճակը չլուծվի կարճ ժամանակահատվածում, ապա Կանադայից Միացյալ Նահանգներ արտահանվող բոլոր ինքնաթիռների նկատմամբ կկիրառվի 50 տոկոս մաքսատուրք։

Հայտարարությունը կարող է ազդեցություն ունենալ ԱՄՆ–Կանադա ավիացիոն և առևտրատնտեսական հարաբերությունների վրա՝ հատկապես բիզնես ավիացիայի ոլորտում։