Տրանսպորտի ուղեվարձի վճարման մասով առկա է 5.5 մլրդ դրամի թերհավաքագրում. 45 տրոլեյբուսների փողը կտա կառավարությունը

Երևան քաղաքի համար առաջնահերթություններից մեկը հանրային տրանսպորտի արդիականացումն ու տրանսպորտային շարժակազմի համալրումն է։

Կառավարությունն իր այսօրվա՝ նոյեմբերի 27–ի նիստում որոշեց 3 մլրդ դրամ դոտացիա հատկացնել Երևանի քաղաքապետարանին՝ թվով 45 տրոլեյբուսների ձեռքբերման նպատակով։

Հիմնավորման մեջ նշվում է, որ Երևան քաղաքի բյուջեում առկա է որոշակի թերհավաքագրում, հատկապես՝ հանրային տրանսպորտի ուղեվարձերի վճարման մասով: 2025–ի բյուջեով տրանսպորտի ուղեվարձերի եկամտից ստացված միջոցները նախատեսվել էր 21 մլրդ 303 մլն 814 հազար դրամ, սակայն ընթացիկ տարվա կանխատեսումներով այդ մասով սպասվում է շուրջ 5.5 մլրդ դրամի թերհավաքագրում (04.11.25թ. դրությամբ փաստացի հավաքագրում կազմել է 12,8 մլրդ դրամ)։ Ստացված միջոցների պակասը հանգեցնում է ծախսերի ֆինանսավորման դժվարություններին։ Անհրաժեշտություն է առաջանում Երևանի քաղաքապետարանին տրամադրել այլ դոտացիա, որը կուղղվի 2025–ի ծախսերի ֆինանսավորմանը, որոնք պետք է իրականացվեին տրանսպորտի ուղեվարձի եկամտից ստացված միջոցներով:

Երևան քաղաքի համար առաջնահերթություններից մեկը հանրային տրանսպորտի արդիականացումն ու տրանսպորտային շարժակազմի համալրումն է։ Մասնավորապես, նախատեսվում է 45 նոր տրոլեյբուսների ձեռքբերում, որի պայմանագրի արժեքի 30 տոկոսն արդեն իսկ նախատեսվել է ՀՀ կառավարության կողմից։ Սակայն ծրագրի ամբողջական իրագործման համար անհրաժեշտ է նաև մնացած 70 տոկոսի ֆինանսավորումը։

Հետևաբար, ընթացիկ ծախսերի ապահովման և համայնքային ծրագրերի ամբողջական ֆինանսավորման համար  համար անհրաժեշտ է առնվազն լրացուցիչ 3.0 մլրդ դրամ։

Այս որոշման ընդունումը հնարավորություն կտա ապահովել Երևան քաղաքի համայնքային առաջնահերթ ծրագրերի իրականացումը, այդ թվում թվով 45 տրոլեյբուսների ձեռքբերումը։