Թրամփի նոր վարչակազմի առաջին տարում ԱՄՆ–Ռուսաստան առևտուրը աճել է գրեթե 24%-ով՝ հասնելով 3.9 մլրդ դոլար

Տասը ամսվա ընթացքում Միացյալ Նահանգները Ռուսաստանից առավել մեծ ծավալներով ներմուծել է բժշկական գործիքներ։

Դոնալդ Թրամփի նոր վարչակազմի առաջին տարվա ընթացքում Ռուսաստանի և ԱՄՆ-ի միջև առևտրաշրջանառությունը զգալի աճ է արձանագրել։ «ՌԻԱ Նովոստի»-ի փոխանցմամբ՝ ամերիկյան մաքսային ծառայության տվյալները ցույց են տալիս, որ 2025 թվականի հունվար-հոկտեմբեր ամիսներին երկրների միջև ապրանքաշրջանառությունը հասել է 3.9 միլիարդ դոլարի։

Համեմատության համար նշվում է, որ Ջո Բայդենի նախագահության ընթացքում՝ 2024 թվականի նույն ժամանակահատվածում, առևտրաշրջանառությունը կազմել է 3.2 միլիարդ դոլար։ Այսպիսով, տարեկան աճը կազմել է 23.9 տոկոս։

Տասը ամսվա ընթացքում Միացյալ Նահանգները Ռուսաստանից առավել մեծ ծավալներով ներմուծել է բժշկական գործիքներ՝ 53.9 միլիոն դոլարի չափով։ Դրանց հաջորդել են տարբեր սոուսներն ու օշարակները՝ 34.9 միլիոն դոլար, ինչպես նաև քիմիական անալիզի սարքավորումները՝ 33.8 միլիոն դոլարով։

Ռուսական շուկայում բարձր պահանջարկ են ունեցել նաև ամերիկյան դեղամիջոցները՝ 27.9 միլիոն դոլար, և ռենտգենյան սարքավորումները՝ 23.6 միլիոն դոլարի չափով։

Միևնույն ժամանակ, Ռուսաստանը էականորեն ավելացրել է դեպի ԱՄՆ արտահանումը։ Հունվարից հոկտեմբեր ընկած ժամանակահատվածում ազոտական պարարտանյութերի արտահանումը կրկնապատկվել է՝ հասնելով տարեկան 1.1 միլիարդ դոլարի։ Պլատինը դարձել է ռուսական արտահանման երկրորդ խոշորագույն ապրանքը ԱՄՆ շուկայում՝ 732.9 միլիոն դոլարի չափով, իսկ կալիումական պարարտանյութերը՝ երրորդը՝ 266.5 միլիոն դոլար։

Բացի այդ, Ռուսաստանը ԱՄՆ է արտահանել գազային տուրբիններ՝ 80.7 միլիոն դոլարի, ինչպես նաև ֆաներա՝ 61.1 միլիոն դոլարի չափով։