Թրամփը Դավոսում քննադատել է «կանաչ» էներգիան՝ այն անվանելով «պատմության ամենամեծ խաբեությունը»

Էներգետիկան պետք է օգնի ձեզ գումար վաստակել, ոչ թե ստիպի կորցնել այն։

ԱՄՆ նախագահ Դոնալդ Թրամփը Դավոսում ունեցած իր ելույթի ընթացքում կոշտ քննադատության է ենթարկել «կանաչ» էներգիայի աղբյուրները՝ հայտարարելով, որ դրանք տնտեսապես ոչ շահավետ են և վնասում են տնտեսություններին։

«Սա կոչվում է «կանաչ» խաբեություն։ Սա խաբեության ամենալուրջ դեպքն է պատմության մեջ», – հայտարարել է Թրամփը։

Նրա խոսքով՝ էներգետիկան պետք է նպաստի տնտեսական աճին և շահույթի ստեղծմանը, մինչդեռ «կանաչ» էներգիայի քաղաքականությունը, ըստ ԱՄՆ նախագահի, հակառակ ազդեցությունն է ունենում։

«Էներգետիկան պետք է օգնի ձեզ գումար վաստակել, ոչ թե ստիպի կորցնել այն», – ընդգծել է նա։

Թրամփը քննադատել է նաև մի շարք եվրոպական երկրների էներգետիկ քաղաքականությունը։ Մասնավորապես, նշել է, որ Մեծ Բրիտանիան պետք է ավելի ակտիվ զբաղվեր Հյուսիսային ծովում էներգակիրների արդյունահանմամբ։ Անդրադառնալով Գերմանիային՝ ԱՄՆ նախագահը վստահեցրել է, որ ներկայիս կանցլեր Ֆրիդրիխ Մերցը փորձում է լուծումներ գտնել երկրի էներգետիկ ոլորտի խնդիրների համար։

Ելույթի ընթացքում Թրամփը քննադատել է նաև քամու տուրբինների կիրառումը՝ ընդգծելով, որ դրանց զգալի մասը արտադրվում է Չինաստանում և նախատեսված է գրեթե բացառապես արտահանման համար։

«Նրանք դրանք վաճառում են այն հիմարներին, որոնք պատրաստ են նման բան գնել», – ասել է Թրամփը։