Toyota-ն կսկսի առաջին էլեկտրամեքենայի սերիական արտադրությունը Եվրոպայում

Արտադրությունը կիրականացվի Toyota Motor Manufacturing Czech Republic (TMMCZ) գործարանում։

Toyota Motor Europe-ը հայտարարում է իր առաջին մարտկոցային էլեկտրամեքենայի սերիական արտադրության մեկնարկի մասին Եվրոպայում։ Արտադրությունը կիրականացվի Toyota Motor Manufacturing Czech Republic (TMMCZ) գործարանում։

Հայտարարությունը կատարվել է Չեխիայի Հանրապետության կառավարության նստավայրում՝ երկրի վարչապետ Պետր Ֆիալայի, արդյունաբերության նախարար Լուկաշ Վլչեկի և Toyota Motor Europe-ի նախագահ Յոսիհիրո Նակատայի մասնակցությամբ։

Ներդրումներն ու գործարանի ընդլայնումը
Նոր մոդելի արտադրությունը սկսելու նպատակով Toyota-ն նախատեսում է մոտ 680 մլն եվրո ներդրում։ Գործարանի տարածքը կավելանա 152 հազար քմ-ից մինչև 173 հազար քմ։ Կկառուցվեն նոր եռակցման և ներկման արտադրամասեր, ինչպես նաև մարտկոցների հավաքման գիծ։ Չեխիայի կառավարությունը նույնպես կաջակցի նախագծին՝ տրամադրելով մինչև 64 մլն եվրո մարտկոցների արտադրության ստեղծման համար։

Մոդելի և արտադրության ժամանակացույցի մասին
Թեպետ Toyota-ն դեռ չի բացահայտում մոդելի մանրամասները, ենթադրվում է, որ դա կլինի կոմպակտ քրոսովեր։ Նախնական տվյալներով՝ արտադրության մեկնարկը նախատեսվում է 2028 թվականին։

Գործարանի ներկայիս գործունեությունը
Այս պահին TMMCZ գործարանում արտադրվում են Aygo X և Yaris Hybrid մոդելները՝ տարեկան մոտ 220 հազար մեքենայի ծավալով։ Նոր էլեկտրամեքենայի արտադրությունը ոչ միայն կավելացնի հզորությունները, այլև կստեղծի նոր աշխատատեղեր։ Բաղադրիչների մեծ մասը կգնի Չեխիայում գործող մատակարարներից։

Պատմական և տարածաշրջանային նշանակություն
Գործարանը գործում է 2002 թվականից և այդ ընթացքում արտադրել է ավելի քան 4.5 միլիոն մեքենա։ Այն համարվում է տարածաշրջանի խոշորագույն գործատուներից մեկը։
2024 թվականից գործարանում գործում է նաև Toyota-ի առաջին եվրոպական լոգիստիկ մեգա-հաբը, որը սպասարկում է դիլերներին Գերմանիայում, Ավստրիայում, Լեհաստանում, Սլովակիայում, Հունգարիայում և Չեխիայում։