Թոմ Քրուզը վաճառքի է հանել Լոնդոնում գտնվող իր բնակարանը անվտանգության մտահոգությունների ֆոնին

Թոմ Քրուզը վերջին մեկ-երկու տարիներին հետևել է Լոնդոնի կենտրոնական շրջաններում հանցավոր միջադեպերի թվի աճին

Հոլիվուդյան դերասան Թոմ Քրուզը վաճառքի է հանել կամ լքել Լոնդոնի Քնայթսբրիջ թաղամասում գտնվող իր բնակարանը, որի արժեքը գնահատվում է մոտ 35 միլիոն ֆունտ ստեռլինգ։ Տեղեկությունների համաձայն՝ որոշումը կապված է անվտանգության իրավիճակի հետ։

Քնայթսբրիջում գտնվող բնակարանը տեղակայված է Լոնդոնի ամենահեղինակավոր շրջաններից մեկում և ունի տեսարան դեպի Հայդ պարկ։ Սակայն վերջին ամիսներին թաղամասում և հարակից տարածքներում արձանագրված հանցագործությունների աճը դարձել է դերասանի որոշման գործոն։

Մասնավորապես, հունվարի 20-ին ցերեկային ժամերին մոտոցիկլետներով ժամանած 4–5 անձից բաղկացած խումբը ներխուժել է Քնայթսբրիջում գործող Rolex ժամացույցների խանութ։ Զինված լինելով մաչետեներով, մուրճերով և այլ գործիքներով՝ նրանք մի քանի րոպեում հափշտակել են ավելի քան 20 թանկարժեք ժամացույց՝ հարյուր հազարավոր ֆունտ ստեռլինգ ընդհանուր արժեքով։ Դեպքի ընթացքում սպառնալիքներ են հնչեցվել հաճախորդների և անվտանգության աշխատակիցների հասցեին, սակայն տուժածներ չեն արձանագրվել։

Տեղեկությունների համաձայն՝ Թոմ Քրուզը վերջին մեկ-երկու տարիներին հետևել է Լոնդոնի կենտրոնական շրջաններում հանցավոր միջադեպերի թվի աճին, հատկապես՝ թանկարժեք ապրանքների վաճառքով զբաղվող օբյեկտների դեմ իրականացվող հարձակումներին։ Վերը նշված միջադեպից հետո դերասանը որոշել է այլևս չմնալ քաղաքում։

Ըստ առկա տվյալների՝ Քրուզը կամ վերադարձել է ԱՄՆ, կամ ժամանակավորապես տեղափոխվել է այլ վայր։ Քնայթսբրիջում գտնվող բնակարանը ներկայում առաջարկվում է վաճառքի կամ վարձակալության։