Այսօր Միջինք է․ Մեծ պահքի ճանապարհի հոգևոր կանգառը

Ժողովրդական ավանդության համաձայն՝ այդ օրը հայ տանտիկինները թխում են բաղարջ, որի մեջ դրվում է մետաղադրամ։

Այսօր Միջինք է՝ Մեծ պահքի կիսող օրը։ Ըստ Մաղաքիա արքեպիսկոպոս Օրմանյանի՝ «միջինք» անունը տրվում է Մեծ պասը կիսող օրվան, որը տոնական նշանակություն չունի։ Այն համընկնում է Մեծ պահքի չորրորդ չորեքշաբթիին կամ պահքի 24-րդ օրվան։

Միջինքից սկսած՝ մինչև Ղազարոսի հարության տոնը, Խաղաղական ժամերգության «Ի Քէն հայցեմք» շարականից հետո երգվում են «Ստեղի»՝ ծանր և հանդիսավոր ձայնեղանակով շարականների հատվածներ։ Դրանք ընտրվում են ըստ օրվա ձայնի և յուրաքանչյուր հաջորդ օրվա հետ համալրվում ևս մեկ տնով։

Հոգևոր իմաստը

Մասյացոտնի թեմի Ոսկետափի Սուրբ Սահակ-Մեսրոպ եկեղեցու փոխանցմամբ՝ Միջինքը բարեպաշտական առումով ինքնահաշվետվության օր է՝ անցած պահքի շրջանը գնահատելու և այն առանց թուլացման շարունակելու վճիռն ամրապնդելու համար։

«Այս օրը յուրահատուկ հոգեբանական դադար է՝ վերաիմաստավորելու անցած աղոթական պահեցողության ճանապարհը և շտկելու բացթողումները»,– նշվում է եկեղեցու էջում։

Ժողովրդական ավանդույթը

Ժողովրդական ավանդության համաձայն՝ այդ օրը հայ տանտիկինները թխում են բաղարջ, որի մեջ դրվում է մետաղադրամ։ Ըստ հավատալիքի՝ ում բաժին հասնի դրամը, տվյալ տարում հաջողություն կունենա։

Հիշեցնենք, որ Մեծ պահքը մեկնարկել է փետրվարի 15-ին և տևում է 48 օր՝ Բուն Բարեկենդանից մինչև Սուրբ Հարության տոնի նախօրեն։ Պահքի ընթացքում օգտագործվում է բացառապես բուսական ծագում ունեցող սնունդ։

Այս տարի Հիսուս Քրիստոսի հրաշափառ Հարության տոնը կնշվի ապրիլի 5-ին։