Հայաստանի իրավապահ մարմինները 2025 թվականին արձանագրել են թմրամիջոցների և ապօրինի զենք-զինամթերքի հայտնաբերման ու առգրավման ծավալների կտրուկ և աննախադեպ աճ: Այսօր խորհրդարանի մշտական հանձնաժողովների համատեղ նիստում՝ 2025 թվականի պետական բյուջեի կատարողականի տարեկան հաշվետվության քննարկման ժամանակ, այս մասին հայտարարեց ՀՀ ներքին գործերի նախարարի տեղակալ Արմեն Մկրտչյանը։
Թմրամիջոցների շուկան և տեղափոխումը համացանց
ՆԳ փոխնախարարի ներկայացրած պաշտոնական տվյալների համաձայն՝ 2025 թվականին ընդհանուր առմամբ հայտնաբերվել և ապօրինի շրջանառությունից դուրս է բերվել շուրջ 768 կգ տարբեր տեսակի թմրամիջոց: Այս ցուցանիշը 80%-ով ավելի է 2024 թվականի արդյունքներից։
Առանձնահատուկ մտահոգիչ է թմրամիջոցների տարածումը թվային տիրույթում: Արմեն Մկրտչյանի խոսքով՝ հաշվետու տարում իրավապահներին հաջողվել է բացահայտել համացանցի (Telegram-ալիքների և այլ հարթակների) միջոցով թմրամիջոցների ապօրինի շրջանառության 460 դեպք։
Ապօրինի զենքի հայտնաբերման թռիչքը
Լուրջ առաջընթաց է գրանցվել նաև հրազենի գործադրմամբ կատարվող հանցագործությունների կանխարգելման և զենքի ապօրինի շրջանառությանը հակազդելու ոլորտում.
«Իրականացված աշխատանքների, ինչպես նաև բացատրական միջոցառումների շնորհիվ 2025 թվականին առգրավվել, հայտնաբերվել և կամավոր հանձնվել է 2246 միավոր հրազեն, ինչը 667 միավորով կամ 42%-ով ավելի է նախորդ տարվա ցուցանիշից»,- նշեց նախարարի տեղակալը։
ՆԳՆ-ն վերահաստատել է իր հանձնառությունը՝ շարունակելու ակտիվ պայքարը թմրամոլության և ապօրինի զենքի տարածման դեմ՝ շեշտը դնելով ինչպես օպերատիվ-հետախուզական, այնպես էլ հանրային իրազեկման աշխատանքների վրա:
