TikTok-ը համաձայնագիր է կնքել ԱՄՆ-ում իր ակտիվները ամերիկացի ներդրողներին վաճառելու վերաբերյալ

Բաժնետոմսերի 45%-ը կպատկանի Oracle, Silver Lake և MGX ընկերություններին։

TikTok-ի սեփականատեր ByteDance ընկերությունը համաձայնագիր է ստորագրել իր ամերիկյան ստորաբաժանումը ԱՄՆ ներդրողների կողմից վերահսկվող համատեղ ձեռնարկությանը փոխանցելու մասին: Այս մասին հայտնում է Axios-ը։

Սոցիալական ցանցի գլխավոր տնօրեն Շոու Ցզի Չուի ներքին փաստաթղթից, որին ծանոթացել է պորտալը, հետևում է, որ գործարքը պետք է իրականացվի հունվարի 22-ին։ Ըստ համաձայնագրի՝ բաժնետոմսերի 45%-ը կպատկանի Oracle, Silver Lake և MGX ընկերություններին։

Համատեղ ձեռնարկությունը պատասխանատու կլինի ԱՄՆ-ում տվյալների պաշտպանության, ալգորիթմների անվտանգության, բովանդակության մոդերացիայի և ծրագրային ապահովման որակի ապահովման համար։

2025 թվականի հունվարին ԱՄՆ-ում ուժի մեջ է մտել դաշնային օրենք, որը պարտավորեցնում է TikTok-ին գտնել սեփականատեր Չինաստանի սահմաններից դուրս, հակառակ դեպքում հավելվածին սպառնում էր արգելք ԱՄՆ տարածքում։ ԱՄՆ նախագահ Դոնալդ Թրամփը մի քանի անգամ հետաձգել է այս պահանջի կատարման վերջնաժամկետը։

Իր հերթին, չինական կողմը կոչ է արել, որպեսզի TikTok-ի վաճառքի գործարքը համապատասխանի Չինաստանի օրենսդրությանը, մասնավորապես այն օրենքներին, որոնք պարտադրում են Չինաստանի տարածքում գործող և անձնական տվյալներ հավաքող կամ տրամադրող կարևոր տեղեկատվական ենթակառուցվածքների օպերատորներին տվյալները պահպանել երկրի ներսում։