Մասսայական ազատումներ չեն լինի. Ինչպիսի փոփոխութուններ են սպասվում ՀԷՑ-ում

ՀԷՑ-ի ժամանակավոր կառավարիչ Ռոմանոս Պետրոսյանը հայտնել է, որ Դավիթ Ղազինյանը չի շարունակի զբաղեցնել գլխավոր տնօրենի պաշտոնակատարի պաշտոնը։

Նրա խոսքով՝ թոփ մենեջմենթի որոշ ներկայացուցիչներ, որոնց ղեկավարության ժամանակ «ՀԷՑ» ընկերությունն ունեցել է համակարգային խնդիրներ, կազատվեն աշխատանքից։ Միևնույն ժամանակ նա ընդգծել է, որ մասսայական ազատումներ չեն նախատեսվում։ 
Պետությունն, ըստ Պետրոսյանի, անհրաժեշտ է համարել միջամտել և կանխարգելիչ քայլեր ձեռնարկել՝ հաշվի առնելով ընկերության ունեցած ազդեցությունը շուրջ 3 միլիոն բնակչի և ավելի քան 1.1 միլիոն բաժանորդի վրա։
ՀԷՑ-ի տնօրենի ժամանակավոր պաշտոնակատար Դավիթ Ղազինյանը, լրագրողների հետ զրույցում անդրադառնալով իր վստահության հարցին, նշել է, որ ինքը չի վստահում ներկայիս իշխանություններին։ Նա ընդգծել է, որ անձամբ էլ վստահություն չունի գործող կառավարման նկատմամբ։
Լրագրողների հարցին, թե արդյոք նա ազատվել է պաշտոնից, Ղազինյանը պատասխանել է, որ նման բան տեղի չի ունեցել։ 
Միաժամանակ նա ակնարկել է, որ որոշ գործընթացներ կարող են ընթանալ օրենքից դուրս՝ հավելելով, որ իր դեմ հնչեցված մեղադրանքներն իրականությանը չեն համապատասխանում և իշխանությունները, եթե փաստեր ունեն, կարող են ներկայացնել։