«ԱրՔա»–ում խափանումներ են եղել. խնդիրը լուծվել է

«Արմենիան Քարդ» ընկերության մամուլի ծառայությունը հայտարարություն էր տարածել, որ «ԱրՔա» համակարգում վերջին օրերին արձանագրված խափանումների պատճառները տեխնիկական են:

«ԱրՔա» ազգային վճարահաշվարկային համակարգում այսօր առավոտյան կրկին խափանումներ են եղել, սակայն այս պահին խնդիրները շտկվել են  «ԱրՔա»–ն բնականոն աշխատում է։

Նշենք, որ մի քանի օր առաջ «ԱրՔա» համակարգում պարբերաբար խափանումներ էին տեղի ունենում, որի պատճառով քաղաքացիները չէին կարողանում փոխանցումներ կատարել, կանխիկացում անել և օգտվել բանկերի առցանց հավելվածներից։

«Արմենիան Քարդ» ընկերության մամուլի ծառայությունը հայտարարություն էր տարածել, որ «ԱրՔա» համակարգում վերջին օրերին արձանագրված խափանումների պատճառները տեխնիկական են, կիբեռհարձակումների կամ տեղեկատվական անվտանգության խախտումների հետ կապ չունեն։

ՀՀ կենտրոնական բանկի նախագահի տեղակալ Արմեն Նուրբեկյանն իր հերթին պարզաբանել էր, որ «ԱրՔա» վճարահաշվարկային համակարգի աշխատանքի խափանման պատճառը եղել է սարքի խափանման արդյունք։ Դա արտասահմանյան մեծ հեղինակություն ունեցող ընկերության կողմից տրամադրվող սարք է։

Հիմա հետազոտություններ են անցկացվում ու մասնագետներ են ներգրավվել հասկանալու համար` խնդիրը որն է եղել։

Նշենք, որ «ԱրՔայի» բաժնետոմսերի 55 %–ը պատկանում է ՀՀ կենտրոնական բանկին, 45%–ը՝ առևտրային բանկերին` բացառությամբ  «ՎՏԲ Հայաստանի»  և իրանական «Մելլաթ բանկի»: