ԱՄՆ-ն պատժամիջոցներ է սահմանել ռուսական վճարային համակարգի դեմ

ԱՄՆ ֆինանսների նախարարությունը կրկին պատժամիջոցների ցուցակում է ներառում «Garantex» կրիպտոարժույթի բորսան:

ԱՄՆ ֆինանսների նախարարությունը պատժամիջոցների ցուցակում է ներառել ռուսական «А7» վճարային համակարգը, «Grinex» կրիպտոբորսան և ևս մի քանի ընկերություններ։ Համապատասխան որոշումը հրապարակվել է գերատեսչության կայքում։

Այնտեղ ասվում է, որ ԱՄՆ ֆինանսների նախարարությունը կրկին պատժամիջոցների ցուցակում է ներառում «Garantex» կրիպտոարժույթի բորսան, որը, ինչպես կարծում են ԱՄՆ-ում՝ ուղղակիորեն աջակցել է հայտնի կիբերհանցագործներին և վիրուսային ծրագրեր մշակողներին՝ 2019 թվականից ի վեր մշակելով ավելի քան 100 միլիոն դոլարի գործարքներ։

Բացի այդ, պատժամիջոցների ցանկում է ներառվել «Garantex»-ի իրավահաջորդը՝ «Grinex»-ը։ Նաև միջոցներ են ձեռնարկվել «Garantex»-ի երեք ղեկավարների և Ռուսաստանում ու Ղրղզստանում գործող վեց փոխկապակցված ընկերությունների նկատմամբ, որոնց նախարարությունը մեղադրում է վնասակար կիբերգործունեության մեջ բորսայի մասնակցությանը աջակցելու համար։

Դրանից առաջ ԱՄՆ ֆինանսների նախարար Սքոթ Բեսենթը չի բացառել Ռուսաստանի դեմ նոր պատժամիջոցներ կիրառելու հնարավորությունը։ Նրա խոսքով, Սպիտակ տան ղեկավար Դոնալդ Թրամփը դեռ ցանկանում է ավարտել հակամարտությունը Ուկրաինայում և հետևաբար, բոլոր տարբերակները բաց է թողնում։