Մեկնարկել է մասնագիտական ուսումնական հաստատությունների ընդունելության գործընթացը․ այն կանցկացվի երկու փուլով

Ոլորտային մասնագիտությունների դեպքում հայտերի ընդունման վերջնաժամկետը օգոստոսի 8-ն է, իսկ օգոստոսի 9-ից 17-ը կկազմակերպվեն ընդունելության քննությունները։

Այսօրվանից՝ հուլիսի 24-ից, մեկնարկել է մասնագիտական ուսումնական հաստատությունների ընդունելության գործընթացը, որը իրականացվում է dimord.emis.am հարթակի միջոցով։

Այս մասին հայտնել է ԿԳՄՍ փոխնախարար Արաքսյա Սվաջյանը մամուլի ասուլիսի ժամանակ։ Ընդունելությունն իրականացվում է երկու փուլով՝ ոլորտային և ոչ ոլորտային մասնագիտությունների համար։ Ոլորտային մասնագիտությունների դեպքում հայտերի ընդունման վերջնաժամկետը օգոստոսի 8-ն է, իսկ օգոստոսի 9-ից 17-ը կկազմակերպվեն ընդունելության քննությունները։

Ոչ ոլորտային մասնագիտությունների դեպքում առաջին փուլի ընդունելությունը կտևի մինչև օգոստոսի 17-ը և կկատարվի առանց քննության՝ դպրոցական վկայականի միջին գնահատականների հիման վրա։

Բոլոր մասնագիտությունների դեպքում տվյալների ամփոփումից հետո տեղի կունենա դիմորդների բաշխում ուսումնական հաստատություններով։ Եթե մնան թափուր տեղեր, ապա օգոստոսի 17-ից կհայտարարվի երկրորդ փուլը, որին կարող են մասնակցել և՛ առաջին փուլում չընդունվածները, և՛ նոր դիմորդները։

Սվաջյանը նշեց, որ ընդունելությունը տարեց տարի աճում է։ Անցյալ տարվա տվյալներով՝ 9-րդ դասարանցիների յուրաքանչյուր երրորդը դիմել է մասնագիտական ուսումնական հաստատություն, և ընդունելության ցուցանիշը 11%-ով գերազանցել է նախորդ տարվա տվյալները։ Առողջապահական, արվեստի և մշակույթի մասնագիտությունները շարունակում են մնալ ամենապահանջվածներից։