Բնակարանային ծրագրի վերանայման հնարավորություն՝ ԼՂ-ից տեղահանված ընտանիքների համար

Դիմելու իրավունք ունեն այն շահառուները, ովքեր մերժում ստանալուց հետո դիմում են հանձնաժողովին երկամսյա ժամկետում։

Լեռնային Ղարաբաղից բռնի տեղահանված ընտանիքների համար նախատեսված բնակարանային ապահովման պետական աջակցության ծրագրում կատարվել են փոփոխություններ, որոնց նպատակն է ընդլայնել հնարավորությունները մերժում ստացած ընտանիքների համար։ Ըստ այդմ՝ արդեն գործում է միջգերատեսչական հանձնաժողով, որին կարող են դիմել այն ընտանիքները, որոնք ստացել են մերժում՝ բնակապահովման ծրագրին դիմելու արդյունքում։

Դիմումը կարող է դիտարկվել, եթե մերժման հիմք հանդիսացած տվյալների մեջ առկա են հետևյալ խնդիրները՝

  • Դիմողի կամ նրա ընտանիքի անդամներից որևէ մեկի անունը բացակայում է ՀՀ ՆԳՆ Միգրացիայի և քաղաքացիության ծառայության կողմից կազմված բռնի տեղահանվածների շտեմարանում կամ 2023 թվականի սեպտեմբերի 19-ի դրությամբ ՀՀ-ում գտնվող ԼՂ բնակիչների ցուցակում (ըստ Օպերատիվ շտաբի)։
  • Դիմողը կամ ընտանիքի որևէ անդամ 2023թ. սեպտեմբերի 19-ին կամ դիմելու օրվա դրությամբ ՀՀ-ում ունի բնակության համար նախատեսված բնակելի անշարժ գույք՝ սեփականության, ընդհանուր համատեղ կամ բաժնային (50 տոկոս և ավելի մասնաբաժնով) իրավունքով, կամ ունի այդ գույքի գնման իրավունքի պետական գրանցում։

Այս փոփոխությունները հնարավորություն են տալիս վերանայել որոշումները և վերացնել տեխնիկական կամ փաստաթղթային շեղումներով պայմանավորված անարդար մերժումները՝ ապահովելով արդար և թափանցիկ մոտեցում աջակցության ծրագրի շրջանակում։