Հայաստանում ծանր սուր շնչառական վարակներով հոսպիտալացվածների թիվն աճում է․ քանի դեպք է արձանագրվել

Մահվան դեպքեր չեն արձանագրվել։

Երևանի երեք բժշկական հաստատություններում՝ ԵՊԲՀ «Հերացի» թիվ 1 և «Մուրացան» հիվանդանոցային համալիրներում, ինչպես նաև Միքայելյան վիրաբուժության ինստիտուտում, սուր շնչառական վարակներով հոսպիտալացվածների շաբաթական վերլուծությունը ցույց է տալիս աճի միտում։

2026 թվականի 12-րդ շաբաթում (մարտի 16–22) ծանր սուր շնչառական վարակներով (ԾՍՇՎ) նոր հոսպիտալացվածների թիվը կազմել է 90՝ նախորդ շաբաթվա համեմատ աճելով 4%-ով։ ԾՍՇՎ դեպքերը կազմել են ընդհանուր հոսպիտալացումների շուրջ 7%-ը։

Դեպքերի տարիքային բաշխումը ցույց է տալիս, որ հիմնական ծանրաբեռնվածությունը շարունակում է կենտրոնանալ երեխաների շրջանում։ Մասնավորապես՝ դեպքերի 60%-ը գրանցվել է 0–4 տարեկանների խմբում, ինչը 20%-ով ավելի է նախորդ շաբաթվա համեմատ։ Այս խմբից 5 հիվանդ բուժվել է ինտենսիվ թերապիայի բաժանմունքում։ 5–14 տարեկանների բաժինը կազմել է 40%։

Նշված ժամանակահատվածում գրիպի դեպքով հետազոտվել է 4 նոր ԾՍՇՎ դեպք։ Մահվան դեպքեր չեն արձանագրվել։

Տարածաշրջանային տվյալների համաձայն՝ Եվրոպայում գրիպի ակտիվությունը նվազել է համաճարակային շեմից ցածր մակարդակի։ Միևնույն ժամանակ, շրջանառվող A(H1) և A(H3) ենթատեսակների մասնաբաժինները համապատասխանաբար կազմել են 43% և 57%։ Գրիպի դրական թեստերի մակարդակը տարածաշրջանում կազմել է 8%՝ շեմից ցածր։

SARS-CoV-2 վարակի ակտիվությունը պահպանվում է ցածր՝ շուրջ 2% մակարդակում։

Միաժամանակ, շնչառական սինցիցիալ վիրուսի (RSV) ակտիվությունը մնում է բարձր՝ շուրջ 10%, հատկապես մինչև 5 տարեկան երեխաների շրջանում, որտեղ հիվանդության բեռը առավել զգալի է։

Տվյալների համադրումը ցույց է տալիս, որ Հայաստանում հոսպիտալացումների աճը պայմանավորված է հիմնականում մանկական խմբերում վարակի տարածմամբ՝ ընդհանուր տարածաշրջանային ֆոնի պայմաններում, որտեղ RSV ակտիվությունը պահպանվում է բարձր մակարդակում։