Կառավարությունը սահմանել է Սևանա լճում 2026 թվականի արդյունագործական որսի չափաքանակներն ու ժամկետները

Որոշման հիմքում դրված է գիտական կենտրոնի կողմից 2025 թվականին Սևանա լճում իրականացված հետազոտությունների հաշվետվությունը։

ՀՀ կառավարությունը փետրվարի 5-ի նիստում սահմանել է 2026 թվականի ընթացքում Սևանա լճում ձկան և խեցգետնի արդյունագործական որսի չափաքանակները, ժամկետները, ինչպես նաև արդյունագործական որսի կազմակերպման պայմաններն ու պահանջները։

Կառավարության որոշման հիմնավորման մեջ նշվում է, որ Սևանա լճում և դրա ջրահավաք ավազանում տարեկան իրականացվում են ձկան և խեցգետնի պաշարների հաշվառման աշխատանքներ, որոնց արդյունքներով ձևավորվում են արդյունագործական որսի առաջարկվող չափաքանակները։

Որոշման հիմքում դրված է գիտական կենտրոնի կողմից 2025 թվականին Սևանա լճում իրականացված հետազոտությունների հաշվետվությունը։ Ըստ այդ հաշվետվության՝ 2025 թվականի հոկտեմբերի դրությամբ Սևանա լճում սիգի ընդհանուր պաշարը կազմել է 3591.8 տոննա, որից արդյունագործական պաշարը՝ 1373.9 տոննա։

Գիտական կենտրոնը 2026 թվականի համար առաջարկել է սիգի արդյունագործական որսի 550 տոննա չափաքանակ, ինչը կազմում է արդյունագործական պաշարի 40 տոկոսը։

Ուսումնասիրության արդյունքներով սահմանվել է նաև սիգի նախաձվադրման և ձվադրման արգելքի ժամկետը՝ 2026 թվականի նոյեմբերի 20-ից մինչև 2027 թվականի փետրվարի 1-ը։

Կառավարության հաղորդմամբ՝ նախագծի ընդունմամբ նախատեսվում է կարգավորել Սևանա լճում կենսապաշարների օգտագործման և կայուն կառավարման գործընթացը։