Կառավարությունը քննարկել է պահեստազորի սպայական կազմի պարտադիր զինվորական ծառայության 2025 թվականի զորակոչի նախագիծը

Որոշման նախագծով նախատեսվում է սահմանել զորակոչի ենթակա անձանց թվաքանակը։

Կառավարության այսօրվա նիստում քննարկվել է «Պահեստազորի սպայական կազմի պարտադիր զինվորական ծառայության 2025 թվականի զորակոչ հայտարարելու մասին» որոշման նախագիծը։

Նախագծի համաձայն՝ 2026 թվականի հունվարի 9-ից մինչև հունվարի 31-ը ներառյալ նախատեսվում է իրականացնել Հայաստանի Հանրապետության զինված ուժերի պահեստազորի սպայական կազմում հաշվառված՝ մինչև 35 տարեկան արական սեռի բժիշկ-մասնագետների պարտադիր զինվորական ծառայության զորակոչ։ Ծառայության ժամկետը սահմանվում է երկու տարի։

Զորակոչը կազմակերպվելու է «Զինվորական ծառայության և զինծառայողի կարգավիճակի մասին» օրենքի պահանջներին համապատասխան։ Այն կվերաբերի այն քաղաքացիներին, որոնք բարձրագույն ուսումնական հաստատությունում ուսումնառության ընթացքում անցել են զինվորական պատրաստություն և որակավորվել են որպես պահեստազորի սպայական կազմի ներկայացուցիչներ։

Որոշման նախագծով նախատեսվում է սահմանել զորակոչի ենթակա անձանց թվաքանակը՝ մինչև 10 հոգի, ինչպես նաև զորակոչի կազմակերպման և անցկացման ժամկետները։

Քննարկված նախագիծը միտված է զինված ուժերի բժշկական սպայական կազմի համալրմանը և մասնագիտական կարողությունների ապահովմանը։