Կառավարությունը հաստատել է 2026–2030 թթ. իմունականխարգելման ազգային ծրագիրը

Պետությունը հստակ տեղեկացված է այն ծնողների մասին, որոնք հրաժարվում են իրենց երեխաներին պատվաստելուց։

ՀՀ կառավարությունը հունվարի 15-ի նիստում հաստատել է 2026–2030 թվականների իմունականխարգելման ազգային ծրագիրը և կանխարգելիչ պատվաստումների վկայականի ստանալու կարգը։

Հարցը ներկայացրել է ՀՀ առողջապահության նախարար Անահիտ Ավանեսյանը՝ ընդգծելով, որ որոշմամբ ամրագրվում է հանրային առողջապահության հիմնարար երաշխիքներից մեկը՝ պատվաստումների ազգային օրացույցը, ինչպես նաև միջազգային պատվաստումների վկայականների տրամադրման ձևաչափը։

Նախարարի խոսքով՝ ծրագրի հիմնական նպատակներն են պահպանել 0–1 տարեկան երեխաների պատվաստումների բարձր ցուցանիշները և ապահովել վարակիչ ու վտանգավոր հիվանդությունների զրոյական դեպքերը։ Նա նշել է, որ վերջին տարիներին ազգային օրացույցում ներդրվել են ժամանակակից վեցավալենտ պատվաստանյութեր, որոնք նվազեցնում են բազմակի պատվաստումների անհրաժեշտությունը։ Ջրծաղիկի դեմ պատվաստումն արդեն ներառված է օրացույցում։

Նիստի ընթացքում վարչապետ Նիկոլ Փաշինյանը հետաքրքրվել է, թե արդյոք մեծահասակների համար նախատեսված են պարտադիր պատվաստումներ։ Առողջապահության նախարարից ստանալով բացասական պատասխան՝ վարչապետը նշել է, որ կովիդի, կարմրուկի, ջրծաղիկի և սեզոնային գրիպի դեմ պատվաստումները մեծահասակ քաղաքացիները կարող են կատարել կամավոր հիմունքներով՝ դիմելով պոլիկլինիկա, և դրանք ապահովվում են անվճար։

Վարչապետը նաև արձանագրել է, որ պետությունը հստակ տեղեկացված է այն ծնողների մասին, որոնք հրաժարվում են իրենց երեխաներին պատվաստելուց։