Եվրահանձնաժողովը ներկայացրել է երեք պահանջ Չինաստանին

Վերջին տասը տարվա ընթացքում ԵՄ-ի առևտրային դեֆիցիտը Չինաստանի հետ հարաբերություններում կրկնապատկվել է:

Եվրահանձնաժողովը ներկայացրել է երեք հիմնական պահանջ Չինաստանին՝ առևտրի և ներդրումների, շուկայի հասանելիության և արտահանման վերահսկողության ուղղությամբ։ Այս մասին մամուլի ասուլիսում հայտարարել է ԵՀ նախագահ Ուրսուլա ֆոն դեր Լայենը՝ չինական կողմի բացակայության պայմաններում։ Նա, սակայն, չի հստակեցրել, թե «ինչ փոխզիջումների է պատրաստ գնալ ԵՄ-ն»։

«Վերջին տասը տարվա ընթացքում ԵՄ-ի առևտրային դեֆիցիտը Չինաստանի հետ հարաբերություններում կրկնապատկվել է և այժմ գերազանցում է 300 միլիարդ եվրոն», – ընդգծել է ԵՀ նախագահը՝ կոչ անելով Չինաստանին նվազեցնել այս անհավասարակշռությունը։

Նրա խոսքով, այդ նպատակի համար անհրաժեշտ է կրճատել արդյունաբերության մեջ իրականացվող պետական ներդրումներն ու խթանել ներքին սպառումը։

Երկրորդ պահանջն առնչվում է շուկայի հասանելիությանը։ Ֆոն դեր Լայենը կոչ է արել Պեկինին «ապահովել ավելի մեծ մուտք եվրոպական բիզնեսի համար չինական շուկա՝ մասնավորապես պետական գնումների համակարգում մասնակցելու հնարավորություն տալով»։ Նա ընդգծել է, որ «եվրոպական շուկան լիովին բաց է Չինաստանի համար», սակայն չի անդրադարձել ԵՄ-ի կողմից չինական ապրանքների նկատմամբ կիրառվող մաքսատուրքերին կամ սահմանափակումներին՝ այդ թվում՝ արևային վահանակների, էլեկտրամեքենաների և Huawei-ի պարագայում։

Երրորդ պահանջը վերաբերում է արտահանման վերահսկողությանը։ ԵՀ նախագահը նշել է, որ Եվրամիությունը ակնկալում է Չինաստանից մեղմացնել հազվագյուտ մետաղների և դրանցից արդյունաբերական բաղադրիչների՝ այդ թվում մշտական մագնիսների արտահանման սահմանափակումները։

«Եվրամիությանը անհրաժեշտ են այդ նյութերի կայուն մատակարարումները», – հայտարարել է Ֆոն դեր Լայենը՝ կոչ անելով արագացնել արտահանման արտոնագրերի տրամադրման գործընթացը։