ԵՄ մտահոգված է Չինաստանի առևտրային քաղաքականությամբ. սպասվում են կոշտ բանակցություններ

Եվրամիության ղեկավարները պատրաստվում են «կոշտ բանակցությունների» Սի Ծինպինի հետ՝ շեշտադրելով տնտեսական և անվտանգային մտահոգությունները։

Պեկինում կայանալիք ԵՄ–Չինաստան գագաթնաժողովը տեղի է ունենում առևտրային լարվածության և Ուկրաինայի հակամարտության ֆոնին։
ԵՄ արտաքին քաղաքականության ղեկավար Կայա Կալլասի խոսքով, միությունը անհանգստացած է Չինաստանի արդյունաբերական մենաշնորհով, առևտրային անհավասարակշռությամբ և տնտեսական ճնշման գործիքակազմով։ Ըստ նրա՝ առևտուրը և անվտանգությունը խորապես փոխկապակցված են։
Financial Times-ը նշում է, որ վերջին մեկ տարվա ընթացքում Բրյուսելը սկսել է 25 հետաքննություն չինական արտադրանքի վերաբերյալ՝ ձգտելով պաշտպանել սեփական արդյունաբերությունը։
Չնայած լարվածությանը, կողմերը որոշակի առաջընթաց կարող են գրանցել երեք ուղղությամբ՝ մատակարարման շղթաների կայունություն, ԱՀԿ բարեփոխում և կլիմայական համագործակցություն։ Այս մասին նշել է չինական համալսարանի պրոֆեսոր Վան Դունը։