Louis Vuitton-ի հոլանդական մասնաճյուղը հայտնվել է փողերի լվացման խոշոր սկանդալի կենտրոնում

Հոլանդական իշխանությունների վարկածով՝ գումարներն ունեցել են անօրինական ծագում և տրամադրվել են ընդհատակյա բանկիրի կողմից, որն արդեն դատապարտվել է։

Louis Vuitton-ի հոլանդական մասնաճյուղը հայտնվել է հետաքննության կենտրոնում, երբ Նիդերլանդների իշխանությունները սկսել են փողերի լվացման գործով քննություն՝ կապված չինացի հաճախորդի հետ։

Բեյ Վ. անունով անձը 2021-ի սեպտեմբերից մինչև 2023-ի փետրվար ընկած ժամանակահատվածում Louis Vuitton-ի տարբեր խանութներից գնել է շուրջ 3.5 միլիոն դոլարի շքեղ ապրանքներ՝ երբեք չգերազանցելով 10,000 եվրոյի սահմանաչափը, ինչը նրան հնարավորություն է տվել խուսափել պարտադիր ֆինանսական ծանուցումներից։

Քննիչների կարծիքով՝ սա եղել է կանխամտածված սխեմա, որի նպատակը մեծածավալ կանխիկ գործարքների թաքցումն էր։ Բեյ Վ.-ն գործել է տարբեր անուններով և էլ․ փոստի հասցեներով, իսկ ապրանքները վերադարձվել են Չինաստան և Հոնկոնգ՝ դաիգոու մեթոդով։ Հոլանդական իշխանությունների վարկածով՝ գումարներն ունեցել են անօրինական ծագում և տրամադրվել են ընդհատակյա բանկիրի կողմից, որն արդեն դատապարտվել է։

Գործով անցնում են ևս երկու անձ, այդ թվում՝ Louis Vuitton-ի աշխատակից, որն ըստ դատախազության, օգնել է սխեմայի իրագործմանը՝ տեղեկացնելով համապատասխան ապրանքների մասին։