Վերջին ամիսներին դոլարի կտրուկ արժեզրկումը կարող է շուտով դրական ազդեցություն ունենալ ԱՄՆ խոշոր բազմազգ ընկերությունների եկամուտների վրա։ 

Դոլարի ինդեքսը (DXY) այս տարվա ընթացքում նվազել է շուրջ 10%, իսկ միայն ապրիլից հետո անկումը կազմել է մոտ 5%։ Դոլարի թուլացումը պայմանավորված է ինչպես ԱՄՆ-ի փոփոխվող առևտրային քաղաքականությամբ, այնպես էլ ներդրողների մտահոգություններով՝ երկրի տնտեսական աճի և պետական պարտքի պատճառով։

Դոլարի արժեզրկումը հատկապես օգտակար է այն ընկերությունների համար, որոնց եկամուտների զգալի մասը ձևավորվում է արտերկրում։ Օրինակ, S&P 500 ընկերությունների միջինում մոտ 41% եկամուտը գալիս է արտասահմանից։ Հաշվարկներով՝ դոլարի յուրաքանչյուր 10% արժեզրկումը կարող է մոտ 2%-ով բարձրացնել շահույթի կանխատեսումները S&P 500 մակարդակում։ Չնայած երկրորդ եռամսյակում սպասվում է եկամուտների աճի դանդաղում՝ առաջին եռամսյակի 13.7%-ից մինչև 5.8%, դոլարի թուլացումը կարող է մեղմել հնարավոր բացասական ազդեցությունները։

Աղբյուրը՝ Reuters