ՀԱՊԿ զորավարժություններում կմշակվի միջուկային զենքի կիրառումը

ՀԱՊԿ զորավարժություններում կմշակվի միջուկային զենքի կիրառումը:

Բելառուսում կիրակի՝ օգոստոսի 31-ին, մեկնարկել են Հավաքական անվտանգության պայմանագրի կազմակերպության (ՀԱՊԿ) «Փոխգործակցություն-2025», «Որոնում-2025» և «էշելոն-2025» զորավարժությունները: Դրանց մասնակցում է ավելի քան 2000 զինվորական Բելառուսից, Ղազախստանից, Ղրղզստանից, Ռուսաստանից և Տաջիկստանից:

«ՌԻԱ Նովոստիի» փոխանցմամբ՝ զորավարժություններում կներգրավվեն 450 միավոր սպառազինություն և տեխնիկա, այդ թվում՝ 9 ինքնաթիռ և ուղղաթիռ, ինչպես նաև տարբեր տեսակի ավելի քան 70 անօդաչու թռչող սարք:

Բելառուսի ղեկավար Ալեքսանդր Լուկաշենկոյի անձնական հրամանով՝ զորավարժությունները արևմտյան և հարավային սահմաններից տեղափոխվել են երկրի խորքը՝ հայտնել է Մինսկը: «Մենք դա գիտակցաբար ենք արել, որպեսզի չլինեն տարբեր տեսակի ակնարկներ, և մեզ չմեղադրեն հնարավոր սադրանքների համար»,- ասել է հանրապետության գլխավոր շտաբի պետ, գեներալ-մայոր Պավել Մուրավեյկոն։

Նրա խոսքով՝ զորավարժությունները կներառեն միջուկային զենքի կիրառման պլանավորում՝ առանց դրա օգտագործման։ «Չի կարելի կիրառել այն, ինչը սպառնալիք է ամբողջ աշխարհի, համաշխարհային անվտանգության համար։ Բայց մենք կսովորենք, թե ինչպես դա պլանավորել»,- ասել է գեներալ-մայորը։